EDITORYAL - Trolls pangguba sa nasud

Gi-disable o di una mahimog maka-komento ang mga netizens sa official Facebook page sa Armed Forces of the Philippines (AFP) tungod sa nagbaha nga mga troll accounts sa nakalabay na mga adlaw.

Matud pa sa pamahayag sa AFP, kinahanglan nila kining buhaton aron walay magamit ang mga trolls sa pagpakatap og mga fake news, misinformation, disinformation ug uban pa.

Apan apil niini kaning mga pagpangilad sa mga troll farms aron linglahon ang publiko sa tinuoray nga mga isyu nga nanghitabo sa Pilipinas ilabi na sa gobiyerno ug sa mga lider niini karon nga adunay kasungian silang Presidente Ferdinand Marcos Jr. ug Bise Presidente Sara Duterte-Carpio.

Sa miaging semana, gisaway si kanhi presidente Rodrigo Duterte tungod sa pamahayag niini nga daw susama og nag-awhag sa AFP nga mo-alsa batok sa kasamtangang administrasyon.

Samtang ang iyang anak nga si VP Sara namahayag nga duna na siyay tawong nakaestorya aron patyon silang Marcos, First Lady Lisa Araneta Marcos ug House Speaker Martin Romualdez kun ugaling nga ipapatay siya og una.

Gisakyan kini sa mga supporters sa duha ka kampo nga nagbinayloay sa ilang mga mahait nga mga opinion. Apan iresponsable kaayo ang mga posts, tungod kay wala gikonsiderar ang implikasyon ug epekto niini ngadto sa nasud, sa ekonomiya, seguridad niini, katawhan ug kabataan.

Kaning troll farms adunay financiers nga nagpaluyo aron paghimo og mga contents nga peke aron ilaron ang mga tawo ug taguon ang tinud-anay nga mga isyu sa nasud aron makapabor ang mga nagsuhol kanila.

 Ang AFP nakamatikod sa comment section sa ilang official Facebook page nga sa ilang tan-aw destabilisasyon ang tuyo ug panggubot sa kalinaw.

Ang social media gigamit sa AFP alang sa pagpakatap og mga impormasyon nga may labot ang katawhan nga makaayo para sa tanan. Apan karon nga gigamit kining venue sa mga troll farms aron guboton ang nasud .

Tungod niini, gipahibalo sa AFP ang publiko nga ipaagi na nila ang tanan nilang mga impormasyon gikan sa mga lehitimong media outlets.