Gipahiyos kunohay
Gipahiyos ni Presidente Ferdinand Marcos Jr. ang mga hulga sa mga Duterte batok sa iyang administrasyon nga iyang gideklarar sa publiko, taliwala sa sibaw nga mga awhag sa iyang mga alyado, nga walay mahatag nga kaayuhan ngadto sa mga Pilipino ang pag-apura sa impeachment ni Bise Presidente Sara Duterte.
Angay bang magsaulog ang mga Duterte sa pagbaraw ni Marcos sa ilang gidudahan nga dugay nang giplano nilang House Speaker Martin Romualdez ug sa iyang mga kongresista? Angay bang mangangkon nga nikakak ang Malakanyang tungod sa ilang mga panghudlat ug panginsulto?
* * *
Si kanhi Presidente Rodrigo Duterte ug iyang anak nga si Bise Presidente Sara Duterte wala matawo gahapon. Nahibawo sila nga dunay usa ka kalibotan ka kalainan sa sulti ug sa buhat ni Marcos.
Ang gibalibalik sa bise presidente mao ang bakak ni Marcos sa paglaslas ngadto sa P20 kada kilo sa bugas humay. Pero mas dakong atraso ni Marcos nila ang pagsige og patuo nga ang iyang administrasyon dili mobalik ug dili motabang sa International Criminal Court (ICC). Pero mopadakop sa kanhi presidente kon palihukon sa ICC ang International Police.
* * *
Dili pa makaginhawa og luag ang mga Duterte atubangan ning abundang mga timaan nga wala mangiyugpos si Marcos sa ilang kampanya sa pagpalagpot niya sa Malakanyang:
Nakigsulti si Marcos ug Armed Forces Chief Romeo Brawner Jr. sa mga heneral human giawhag sa kanhi presidente pagbakwi sa suporta sa commander in chief nga gihulagway nga adik sa cocaine;
Human nagpakahilom sa pantasya sa bise presidente pagputol sa iyang liog ug pag-ugkat sa patayng lawas sa iyang amahan, nitingog si Marcos human gihulgang patyon uban sa iyang asawa ug ig-agaw;
* * *
Wala badlonga pero gidasig hinuon ang mga imbestigasyon sa mga kongresista sa mga pasangil sa extrajudicial killings sa kanhi presidente ug pangurakot sa bise presidente;
Nikalit lang og paspas ang Philippine National Police (PNP) ug National Bureau of Investigation (NBI) paglista sa mga kasong kriminal nga ipasaka batok sa bise presidente ug sa iyang mga guwardiya; ug
Gidayon sa House ug Senado ang P1.3 bilyones nga laslas sa kapin sa P2 bilyones nga budget nga gipangayo sa Office of the Vice President (OVP) sa 2025.
* * *
- Latest
