Apas sumpay kalabot sa demonyo sa gubat ug kalaglagan

(Unang bahin)

Ang Kasamtangang Nahitabo sa Atong Nasud

Kasamtangan atong nasaksihan ang tensiyon tali sa atong mga pamunoang nasud. Kun sa unsang paagiha ilang gilabay ang matag usa sa mga nagkadaiyang mga pasangil.

 Naugkat ang mga nalubong mga kriminalidad, anaa ang mga hulga, ang pagpasaka og mga nagkadaiyang mga kaso, ang paglaban sa mga supporters ug ang pagtawag sa mga bansagon sama sa buaya, boang! Ug uban pang matang sa tunglo ug mga panghimaraot. Ang kanhiay sabakan sa Pilipinhong Pag-Alsa gibalikan aron dugokan, mosimba, magpundok pundok alang sa usa ka protesta didto sa EDSA apan sa dihang sila gipangutana sa hinungdan, wala silay kasayuran timailhan nga wala sila matarong og pasidaan.

Anaa ang mga panghudlat ug ang matag kampo nagpadayganay sa ilang mga panahom uban na ang mga bugal bugal ug kaligutgot.

Sa Libro nga sinulat ni Father Gallagher: The Discernment of Spirits pp. 32-33 dunay duha ka mga Sukaranang Padulngan ang atong Kinabuhi. Ang kinabuhi nga makapaduol nato sa Ginoo ug ang makapalayo nato kaniya. 

1. Ang makapalayo nato sa Ginoo mao kadtong kahimtang diin ang usa ka tawo nagabuhat og usa ka salang mortal ngadto sa laing mga salang mortal.

2. Ang makapaduol nato sa  Ginoo mao kadtong kahimtang diin ang tawo naningkamot ug nipili nga magpahilayo gikan sa mga salang mortal nga maoy babag sa atong pakigsuod sa Dios.

Ang Kaaway sa atong Espirituhanong Paglambo

Kasagaran ang mosantop gyud dayon sa atong hunahuna ang yawa. Ning paagiha atong himoon ang mas halapad nga pagsabot sa termino nga yawa. Siya kadtong masupilong anghel o mga anghel nga gihinginlan gikan sa langit. Sa laing bahin ato usab siyang sabton ingon nga unhealthy tendencies nga anaa sa matag tawo. Siya kadtong pito ka mga sala nga gitudlo sa katesismo. Ug kun atong sumadahon makalaglag gyud kanato lawas ug kalag. Iyang tinguha nga mas mahimo kitang halayo sa Dios. Ug pinaagi sa atong personal nga pag-uyon pinaagi sa pag-uyon sa iyang makahaylo nga lit-ag nan, nagalakat kita padulong sa atong kamatayon. Kun mahitabo kini sa matag tawo, mahitabo usab kini sa tibuok nasud.

INGON ANA KALAPAD ANG MAHIMONG IMPLUWENSIYA SA DEMONYO.