Misamot paglutaw ang tinuoray'ng kamangtas ni Presidente Bongbong Marcos Jr. (PBBM) dihang mibulag si Bise Presidente Sara ‘Inday’ Z. Duterte sa iyang korap nga gabinete isip Department of Education (DepEd) secretary kay giluod na sa kahugaw'g dinad-an ni PBBM sa atong nasud, kinsa sa kadagha'g tam-is nga saad panahon sa kampanya, bisan usa, wala gyoy natuman dihang siya nay nakalingkod sa Malakanyang.
Tawo nga may prinsipyo ug kahadlok sa Diyos si Inday. Kon unsay iyang gisaad sa katawhan sa miaging 2022 election campaign period, kining tanan iyang gihatag. Kaaway niya ang mga tawong bakakon-tigpakaaron-ingnon.
Pagbulag ni Inday sa administrasiyong Marcos, gipangilisan dayon tanang sinaligan niyang Vice Presidential Security and Protection Group og mga bag-o nga gikahingawa kaayo sa diehard Duterte suporters.
Tungod kay sa maong kausaban, dili na luwas ang seguridad ni Inday.
Tuod, nahitabo ang gikahadlokan. Sumala pa ni Inday, usa sa mga bag-ong security, gustong mopatay niya pinaagi sa paggulgol sa iyang liog. Apan wala kini molampos. Ug ang taas-dakong linya sa uwat nga agi sa maong krimen, makita sa iyang liog. Busa, dili matabonag bakak.
Hilom kaayo ang mainstream media niining hitaboa. Usab, hilom kaayo si PBBM, kinsa inay paimbistigahan aron masubay kinsay mga mastermind, gibali-wala lamang. Butang nga nakapalig-og samot sa hunahuna ni Inday, kinsa ang mga tawong nagpaluyo niini?
Sa usa ka press conference, hait kaayo ang mga mata sa agila nga mipahibalo-nanguhit-nanglabtik: “Kon sa sunod higayon molampos na sila pagpatay nako, may usa ka tawong gikasabot na nako, nga ingkasog mamatay ko, patyon sab sila si Bongbong Marcos, Liza Araneta ug Martin Romualdez.”
Pastilan, gipakasama dayon ni PBBM nga dakong hulga kini sa ilang kinabuhi, uy! Busa, kinahanglang iya dayong aksiyonan. Ug ipataral ang nagbahad ngadto sa hukmanan.
Pero, yuna, bahad ba ang gihimo ni Inday, o usa lamang ka pahinumdom?
Timan-i, igo ra siyang miingon, nga kon patyon siya, ipapatay sab ang mga mastermind. Nga sa ato pa, kon patyon lang siya. Pero, kon dili siya patyon, aw, wala poy paninglan og kamatayon?
Nganong mireak man gilayon si PBBM? Nagpaila ba kini nga wala gyod siyay alamag sa balaod nga patas? Hoy, Mr. President, gising!