Mao kini ang nahitabo karon sa mga Duterte kinsa kaniadto gipakabathala sa mga sipsip nga politiko kinsa halos motilap sa lapalapa sa kanhi presidente nga ilang gipalakpakan ug giligo sa pagdayeg ilabi na sa pamaagi niini sa paglimpyo sa mga badlongon sa katilingban.
Dili ikalimod nga kong unsa ka impluwensyado ang ang amahan nga Duterte ingon usab niini ang iyang mga anak ilabi na si Inday Sara nga aduna usay kinaugalingon nga estilo nga susama o mas labaw sa iyang amahan.
Ang tanang politiko nga nangambisyon nga mabutang sa pedestal nagpanon didto sa Davao nga nangayo og bendisyon alang sa ilang ambisyon apil na ang banay'ng Marcos nga sama sa ulitawo gikan sa Luzon nagsige og panguyab sa maanyag nga anak sa Mindanao aron lang makuha ang tam-is nga pagsugot niini. Gani niabot pa sa punto nga niyukbo ug niluhod aron maseguro nga makuha ang kamot niini.
Bisan pa man sa wala pag-uyon sa amahan kay lagi wala kini kagustohi, nagtuman sa gusto ang anak ug gisugot ang nanguyab niya ug nagpares gyud sila sa eleksiyon kinsa nakakuha og makangog nga landslide victory, ang usa nakaangkon ug 31 million votes samtang ang usa 32 million votes.
Gisaw-an nilang duha ang katam-is sa ilang kadaugan nga nagpakita kuno kahiusahan sa katawhan. Daw inseparable ang presidente ug ang bise presidente tungod sa lig-on nila nga relasyong politika.
Apan sama sa ubang magtiayon inanay'ng nihupas ang ilang gibati dihang nagkailhanay silang duha nga dili diay magkatakdo ang ilang mga prinsipyo hangtud hingpit nga mibiya si VP Sara sa poder ni PBBM ug sinugdanan pa lang diay kini sa mas grabe nilang away.
Naglinabayay na karon og mga pasangil ang duha ka mga kampo ug siyempre ang kadtong nga sipsip nga politiko didtl gyud modapit kong kinsa ang naa sa taas o mas gamhanan nga mao ang presidente.
Isig sinipsipay na gamit ang duha ka balay balaoranan kinsa parehong nangita og pamaagi aron mabitik sa lit-ag ang mga Duterte ilabi na ang bise presidente.
Ang mga politiko nga niyukbo kanila kaniadto ug nidayeg sa mga programa ang susamang mga politiko ang nitulisok kanila nga halos lod-an pa ang mga nawong niini aron lang mosamot pagkalukapa.
Ingon niini ang realidad sa politika, unta kong naminaw pa lang si Inday Sara sa iyang amahan dili unta mahitabo ang pagtraydor nga ilang nahiaguman karon. Hinuon dili man pud makatugot ang bise presidente nga sa dakong kasayon mosurrender sila ug mao kini atong atangan.