Kahinumdoman, sa Kongreso, diin maoy unang mituki sa 2025-P2B-OVP budget proposal, imbes mo-approve dayon niini sanglit naladlad na sa OVP asa paingon ug unsay gamitan sa maong pundo, nagsige hinuog balikbalik paghisgot ang mga Kongresista sa 2022 P125M-OVP confidential fund nga wala na sa linya ug dili na angay tandugon.
Apan tungod kay ilang tumong mao man ang pagguba sa reputasyon ni Vice-President Sara ‘Inday’ Z. Duterte, gusto nila kining patambungon sa matag Congress Office of the Vice President (OVP) budget hearing aron ilang magamit ang ‘stick to the plan’ script, diin duha ka beses man tuod mitambong si Inday, pero wala nila mapahimusli kay natiktikan man ni Inday ug napangitaag paagng silang tanan masupalpal.
Sa ilang kalagot nga wala na motungha si Inday sa hearings, gusto nilang serohon ang 2025 OVP budget. Daghang netizen ug pipila ka kongresista ang mialma-nakasaway niini. Kaha, nadutlan silag gamayng ulaw, wala madayon ang pag-zero. Pero gihimong P733M na lang ang ilang gi-endorse nga 2025-OVP budget ngadto sa Senado, kinsa maoy pinaleng modesisyon.
Ug miabot ang adlaw sa paghukom. Pagka Nobiyembre 13, 2024 didto si Inday, mitambong sa 2025 OVP budget Senate hearing. Iyang nasaksihan si Senador Bong Go, kinsa sa iyang manifestation misayasay unsay mga kaayohang nabuhat sa OVP sa atong nasod? Iyang gibatbat unsa ka-andam ang OVP pagtunol og hinabang ngadto sa mga biktima sa katalagman, paghatag og burial assistance sa mga namatyan, pagpasiugdag ‘Magnegosyo ta, Day’ projects ug daghan pa. Gusto man si Inday og trabaho. Busa, tabangan nga makapadayon. Busa, kinahanglang pun-an ang OVP budget, o ibalik ang original budget niiining gi-proposed.
Tapos sa manifestation ni Senador Go, si Senador Bato dela Rosa na poy mipuli, diin gi-nominate gilayon niya ang pag-aprobar sa OVP budget. Misumpay dayon og “I second the motion” si Senador Cynthia Villar. Unya, dihang walay mibaraw, mideklarar si Senate President Pro-Tempore Senador Jinggoy Estrada og ‘budget is hereby approved.’
Makapahibulong-makapalipay ang senariyo. Mga senador miduol sa nagpasalamat nga Inday ug sila mahinangpong milamano. Mga tilimad-on nga diha sa Senado, nagakadaghan na iyang mga dumadapig.
Diin segurado, sa Kongreso makapaminghoy. Pero sa OVP ug sa milyonmilyong supporters ni Inday, nakapanaghoy.