Editoryal — Nagbukal nga politika sa Cebu City

Nagkaduol ang eleksyon nagkasamot ang pagbukal sa kawa sa politika sa Cebu City nunot niining mga nahitabo diha sa city hall tali nilang Mayor Raymond Alvin Garcia ug dismissed mayor Michael Rama.

Si Garcia milingkod isip mayor sa siyudad human matud pa nigawas ang kamandoan gikan sa Ombudsman nga nag-dismiss gikan sa serbisyo ni Rama tungod sa iyang kaso.

Apan si Rama niinsister nga siya pa gihapon ang mayor tungod kay wala pa niya pormal nga nadawat ang kamandoan gikan sa Ombudsman ug sa DILG.

Napun-an pa gyud ug nisamot kakomplikado ang isyu tungod sa teknikalidad kay ang kampo ni Rama mipasangil nga daw gidali-dali ang paglingkod ni Garcia pinaagi sa paglaktod sa proseso sa paghatud sa desisyon aron makalingkod kini dayon.

Teknikalidad nga posibleng makaapektar sab kang Garcia sa umaabot nga mga adlaw, apan dili makapausab sa gipagawas na nga desisyon sa Ombudsman.

Gani karon palang, nagpatong-patong na ang mga kasong gipasaka batok kang Garcia gikan sa kampo ni Rama ngadto sa Ombudsman. Duna say mga nangapagan sa isi’g ka habig.

Tungod niini, makapaabot gyud nang katawhan sa dakbayan og mainitong panagribal sa duha ka kampo karong umaabot nga piniliay sa sunod tuig.

Kaning ilang mga gipanghimo karon, bisan unsa  pay ilang ipanulti nga rason, usa kini ka pagpasalida sa kun unsa sila ka maayong laki ug kun kinsa ang naa sa saktong posisyon.

Padaghanay sila og kamahoan sa balaod ug patas-anay og tugot sa pisi kun kinsa kinsay makalahutay hangtud sa kinatumyan.

Bahala og mag-ingon ani sila pirme, basta ang importante dili mabalda ang serbisyo diha sa city hall. Kay kun mahitabo gani kini, masakripisyo na ang katawhan dili kini maayo para sa duha ka habig.

Dili maayong kalimtan nga gawas sa ilang duha, dunay ikatulo nga nidagan sab sa pagkamayor sa siyudad nga susama sab nilang duha kalig-on ug duna say kaugalingong lig-ong tigpaluyo ug lig-ong partido.

Basin sa tanto nilang ilog sa gahum, wala nilang duha maoy makaangkon niini ini og human sa piniliay sa Mayo 2025.