Tinuod nga kabahin sa gahom sa Kongreso ang pagpahigayon og mga imbistigasyon nga lakip sa ilang oversight function aron pagpanday og mga balaod pagkorehir sa mga sayop ug pagpalambo pa sa sistema sa kagamhanan.
Apan angayang limitahan sa mga kongresista ang ilang mga imbistigasyon kutob lang sa pagtan-aw unsay angayang usbon sa polisiya ug kun unsay balaod nga angayang pandayon aron pagkorehir sa dili husto nga mga pamaagi.
Angayang likayan sa mga kongresista ang pagpangabuso sa ilang gahom pag-imbistigar aron lutoson ang ilang mga kaatbang sa politika. Ug dili husto nga ang mga kongresista na maoy mohimo sa trabaho nga angayang iya sa Department of Justice ug sa kapolisan.
Usa sa mga dayag nga pananglitan sa pag-abuso sa mga kongresista sa ilang oversight function mao ang paglutos kang Bise Presidente Sara Duterte tungod sa dili niya mapasabot nga paggasto sa intelligence fund sa iyang buhatan. Wala ko nag-ingon nga dili nato pangayoan og husay ang bise presidente giunsa niya paggamit ang minilyon nga pundo sa iyang buhatan. Apan sobra napud tingali ang gihimo sa mga kongresista nga utingkayon lakip ang tinuod nga identity sa usa sa mga nakadawat sap undo.
Sa tinguha sa mga kongresista nga mahibaw-an ang tinuod nga pagkatawo ni “Mary Grace Piattos”, nitanyag sila og P1 million nga ganti alang ni bisan kinsa nga makahatag og impormasyon sa iyang pagkatawo.
Nagplano pa si Kongresista Joel Chua, ang chairman sa House committee on good government, nga makig-alayon sa Philippine Statistics Authority aron gyud pagtino tinuod ba o peke si Mary Grace Piattos.
Para unsa? Aron pruwebahan nga namakak si Duterte ug posibling iyang gikurakot ang pundo sa iyang buhatan?
Tungod kay intelligence fund ang atong gihisgutan dako gyud ang posibilidad nga peke ang maong pangalan ug wala ni nagpasabot nga gikurakot sa bise president ang pundo. Normal ni nga ang mga informant mogamit og alyas alang sa ilang siguridad ug aron kaprotehian ang ilang kaugalingon ug pamilya.
Kun sa tan-aw sa mga kongresista anomaloso ang gihimo sa buhatan sa bise presidente ang angayan nilang buhaton itugyan sa DOJ ang imbistigasyon ug magbuhat sila og balaodnon aron pagkorehir sa mga lagda paggamit sa intelligence fund.
Kun way politika nga motibo nga nagpahipi sa ilang imbistigasyon mao ni ang angayan nilang buhaton.