Mga nuisance candidates

Gideklarar sa COMELEC ang 117 ka kandidato pagka senador isip mga nuisance candidates.  Segun sa lagda sa Omnibus Election Code, ang mga nuisance candidates mao kadtong miduso sa ilang COC aron lang sa pagbugal-bugal sa election process o ba kaha nasuta nga wala gayod sila’y kapasidad sa paglusad og tinuoray nga kampanya.  Ambot kon unsay nasulod sa utok ni’ng maong mga kandidato nga mangahas man gyud og dagan bisan sa ilang kakulangon. Apan mao kana’y giingon nga, “Ang tawo may katungod mohimo sa iyang kaugalingon’g kalingawan bisan maghimo kini kaniya nga kataw-anan.”  Fezteleern!

IMPORTASYON RA’Y SOLUSYON

Dako ang kadaut sa sektor sa agrikultura gumikan sa nagsunod-sunod nga bagyo nga miigo sa nasud nga miresulta sa P10 bilyones nga alkanse.  Labing apektado ang mga kahumayan ug mga sistema sa patubig apan sumala kang DA Asec. Arnel de Mesa dali ra kini ma-solusyonan pinaagi sa pag-angkat og bugas.  Wala na ba diay laing sulosyon ang DA gawas sa importasyon?  Inay hatagan og direktang suporta ang mga mag-uuma, importasyon gilayon ang ilang nahunahunaan.  Matud pa sa akong higala, “Ni’ng matang sa panghuna-huna sa DA, maayo tingale nga sila maoy atong i-export ngadto sa laing nasud.”  Madahaan!

NAGPAHIPI NGA MANDO

Miluwat og direktiba ang DepEd ngadto sa tanan niining mga buhatan ug eskwelahan nga ihikling lang una ang mga bongga nga pagsaulog sa Christmas party subay sa kamanduan ni Presidente Marcos, Jr.  Sayon ra kaayo ang pagtuis sa maong direktiba.  Manawag lang ang mga maestra sa mga ginikanan sa ilang mga “honor students” aron maoy himoong sponsor, sulbad na ang Christmas party.  Maingon nato nga daw adunay nagpahipi nga mando ang direktiba nga nag-ingon, “Kadtong mga maestra nga dili makahimo’g maanindot nga Christmas party, wala’y mga diskarte.”  Muleeng!

PAMOLITIKA ATOL SA FIESTA SENYOR

Mipasidaan ang mga kaparian sa Basilica Minore del Sto. Nino de Cebu nga dili gamiton sa mga politiko ang kasaulogan sa Fiesta Senor alang sa ilang politikanhong katuyoan.  Gidasig gihapon sa simbahan nga mosalmot sila sa selebrasyon isip mga deboto ug dili palutawon ang ilang pagka-politiko.  Sa kadaghan sa tawo atol sa maong kasaulogan, maka-ikag ang kahigayonan alang sa pagpamolitika.  Matud pa sa akong amigo, “Daghan gihapon ang di motuman.  Dili kabalak-an ang pasidaan sa simbahan kay wala man i-apil sa pasidaan nga gabaan ug mapildi ang kandidato kon mosupak.”  Atala lagee!

MGA “HUNGRY DETERGENT”

Tungod ba kaha sa inspirasyon sa kadaugan ni Donald Trump isip presidente sa America, gidasig usab ni Kongresman Pantaleon Alvarez si kanhi presidente Rodrigo Duterte nga moddagan pagbalik pagka-presidente karong 2028.  Gilatid sa atong Konstitusyon nga usa lang ka termino ang presidente busa nanimahong “kagwang” kining sugyot ni Alvarez.  Sa panglantaw sa akong amigo, nagpakita kini nga gutom lang sa politikanho’ng gahum ang kongresista.   Makapahinumdum kining sugyot ni Alvarez sa commercial kaniadto bahin sa usa ka sabon-panlaba nga “DRIVE” diin giingon nga usa kini ka “hungry detergent”.  Pagkatoytoy!