EDITORYAL — Nag-una ang Cebu?

Mialma ang Police Regional Office-7 sa report sa usa ka pamantalaan nga nag-ingon nga ang Cebu maoy dunay pinakadaghang kaso sa mga drug related killings atol sa war on drugs karon sa panahon ni Presidente Ferdinand Marcos Jr.

Ang maong report nga gikutlo sa sab gikan sa Dahas Project nga gipasiugdahan matud pa sa Third World Studes Center of the College of Social Sciences and Philosophy sa University of the Philippines Diliman.

Matud pa nga gika Enero hangtud Oktubre 15 ning tuiga, adunay 65 ka mga kaso sa pagpatay nga nahitabo dinhi, ug kining tanan drug-related killings.

Medyo gihalangan ang kadagkoan sa PRO-7 sa maong report, tungod kay kun buot subayon ang maong mga kaso sa pagpatay matud pa nila, wala may apil sa pagkahitabo ang mga polis.

Base sa imbestigasyon sa kapolisan sa mga nahitabong pagpamusil  ning tuiga sagad sa mga namatay pulos  mga nalambigit sa ilegal nga drugas.

Apan sukwahi sa panahon sa war on drugs ni kanhi presidente Rodrigo Duterte, nga kanunay naa gyuy nalambigit nga polis sa kamatayon sa mga drug suspects, karong tuiga wala.

Sagad sa mga nakapatay o mga suspek dili man mga polis kondili mga  indibidwal nga sumala pa sa imbestigasyon personal ang motibo ug may kalabotan sa kalambigitan sa biktima sa ilegal nga drugas ang pagpatay kanila.

Wala say operasyon batok ilegal nga drugas ang mga otoridad diha sa maong mga dapit diin nahitabo ang pagpatay kanila, matawag ba diay gihapon kini nga war on drugs sa gobiyerno kun walay kapolisan nga nalambigit?

 Hinuon, dili malimod nga nalambigit sila sa ilegal nga drugas kay ang uban kanila duna man gyuy rekord kaniadto. Apan kay nigawas naman kining balitaa, maayo tingaling mohatag og katin-awan ang kapolisan bahin niini, kay basin magtuo ang publiko nga silay nagpaluyo aning pagkamatay sa mga drug suspects.

Pagkatinuod, daghan ang nasuko aning ilegal drugs ug sa mga tawong nalambigit niini, mao nga matag duna gani mapatay nga drug suspects, wala kaayong mosimpatiya sa ilang mga nagbangutang pamilya, tamayon pa gani hinuon.