Sa iyang pag-atubang sa mga senador ug mga kongresista sa public hearings sa extrajudicial killings (EJKs) sa drug war ni kanhi Presidente Rodrigo Duterte, wala manulisok si kanhi Senador Leila de Lima sa mga nitabang pagmaniobra og mga ebidensiya aron mapriso siya sa dul-an sa pito ka tuig.
Igo lang nipahinumdom nila nga kon wala pa undanga ang iyang imbestigasyon sa EJKs niadtong 2016, mahunong untang pagbanaw sa dugo ug dili makaabot og 35,000 ka kinabuhi ang nakalas, apil nang kapin sa gatos ka inosenteng mga bata.
* * *
Para sa mga dili sama kamapasayluon ni de Lima, niang mga senador nga nipalagpot niya sa Senate Committee on Justice and Human Rights ug ni-absuwelto ni Duterte sa EJKs:
Si Alan Peter Cayetano nisugod sa kampanya pagpahilom ni de Lima pinaagi sa pagpasangil nga tibuok nasud ang nauwawan sa iyang pagtuki sa EJKs. Si Manny Pacquiao niawhag nga palagputon si de Lima sa komitiba. Nidason pagkondenar ni de Lima silang Sonny Angara, Nancy Binay, JV Ejercito, Sherwin Gatchalian, Richard Gordon, Gregorio Honasan, Panfilo Lacson, Loren Legarda, Manny Pacquiao, Koko Pimentel, Grace Poe, Tito Sotto, Cynthia Villar, Migz Zubiri ug Joel Villanueva.
* * *
Nia sang mga kongresista nga imbes mo-imbestigar sa EJKs nilambigit ni de Lima sa shabu sa New Bilibid Prison: Pantaleon Alvarez, Raneo Abu, Romeo Acop, Michael John Duavit, Rudy Fariñas, Paulino Salvador Leachon, Karlo Nograles, Eric Martinez, Danilo Suarez, Abraham Tolentino ug Jerry Treñas.
Nangulo sa imbestigasyon si Reynaldo Umali sa Committee on Justice. Bastos nga nangutana sa pribadong mga detalye sa relasyon ni de Lima ug sa drayber nga si Ronnie Dayan silang Fariñas ug Harry Roque. Dihang gisaway sa ilang kaubanan ang pagbinastos, niinsistir si Gwen Garcia nga angayng hukasan si de Lima.
* * *
Dihang gikuwestiyon ni de Lima atubangan sa Korte Suprema ang laktod nga pagpriso niya, ang mosunod nga mga mahistrado nibasura sa iyang petisyon ug nitugot sa mga korte paghusay sa tulo ka kasong kriminal batok niya:
Noel Tijam, Presbitero J. Velasco, Jr., Teresita J. Leonardo-De Castro, Diosdado M. Peralta, Lucas P. Bersamin, Mariano C. Del Castillo, Estela M. Perlas Bernabe, Samuel R. Martires, Andres B. Reyes, Jr. ug Alexander G. Gesmundo.
* * *