Giatangan sa milyon-milyong mga Pilipino ang Ms. Universe 2024 nga gihimo didto sa Mexico kagahapong adlawa. Mao kini ang labing unang higayon nga usa ka Black Filipina ang morepresentar sa nasud sa maong prestihiyosong indigay sa kaanyag sa kalibotan.
Si Chelsea Manalo wala man tuod makasulod bisan sa final 12 candidates, siya maoy gipasidunggan ug gihatagan og titulo sa organisasyon isip Miss Universe-Asia Queen kauban ang lain pang mga maanyag nga kandidata sa uban pang kontinente sa kalibotan.
Ang 73rd Miss Universe sa labing unang higayon miila sa mga pinakamaanyag nga kandidata gikan sa upat ka dagkong kontinente sa kalibotan, ang Asia, Americas, Africa and Oceana ug Europe and Middle East.
Nagpasabot kini nga si Manalo maoy mabutang sa kasaysayan sa Miss Universe isip labing unang Miss Universe Asia Queen, sama sa uban nga napili sab gikan sa laing tulo ka kontinente.
Hinuon dinhi sa Pilipinas, dunay daghang mga mipadayag og suporta kang Manalo sama sa gibuhat sa mga Pilipino sa nangaging mga kandidato nga pambato sa Pilipinas sa maong indigay sa kaanyag.
Apan dili gyud kalikayan nga duna say pipila nga mi-bash kaniya diha sa internet, kay lagi para kanila duna pay laing mas angayan unta nga morepresentar sa nasud.
Kataw-anan lang sab ning uban kay dili gihapon makadawat sa resulta. Hinuon ingon niana man gyud, dunay modaog ug duna say mapildi.
Maayo nalang gani nga si Manalo nakasulod bisan sa top 30 nungka sa ubang mga kandidata, kana palang daan dako na kini nga kalamposan kay 125 ka kandidata ang nagtigi sa korona.
Angay sab kining ipasalamat sa Pilipinas kay wala pa sukad mabiya og layo ang atong mga pambato sa mga susama niini ka prestihiyosong mga pageant competition.
Wala man tuod makuha ang korona, magpasalamat gihapon ang mga Pilipino kay sa kadaghan sa kandidato sa kontinente sa Asya, ang atong pambato maoy gipiling Ms. Universe Asia Continental Queen.