Palaaway di haum nga alternatibo

Nagtipun-og na sab ang mga kaso sa buhatan sa Ombudsman batok sa mga incumbent nga opisyal.

Unsaon nahimo naman nga kinaiya sa mga buot moatbang sa mga incumbent ang pagpangiha aron dauton ang ilang kontra.

Ang uban nagtakuban pa nga misang-at og kaso. Nagtago sa ilang kaugalingon nga ang tumong ug tuyo mao ra gyud ang pagdaot sa kaatbang.

Dunay uban nga manggamit og laing tawo aron mobarog ka kihante.

Ang resulta magtipun-og ang way mga hinungdan nga kaso didto sa Ombudsman tungod lang kay dunay mga talawan nga buot magpapili bisan way klarong programa ug plano.

Duna say uban nga labihan ka alingogngog diha sa social media.

Nalukop og panaway sa mga incumbent apan way gipresentar nga alternatibong programa.

Di kinahanglan nga manaot aron magpahumot sa publiko.

Dili bogo ang mga botante nga wa makakita sa problema ug apan sa ilang mga opisyal.

Busa kun buot ninyong maangkon ang suporta sa publiko, kumbinsiha ang mga botante nga mas angayan ka nga saligan pinaagi sa pagpresentar sa imong mga programa inay nga mangaway.

Ang mga kandidatong pangaway ug panaway ray gisaligan dili maoy haum nga alternatibo.