Duterte sa diskarte, puwerte

Human sa sagunsong pag-indiyan ni kanhi Presidente Rodrigo Roa Duterte (PRRD) sa imbitasyon sa Kongreso alang sa extrajudicial killing (EJK) hearing sa Ubos Balay Balauranan, sa kataposan mitambong ra siya sa miaging Nobiyembre 13, 2024.

Gusto unta kining i-postpone sa mga kongresista sanglit wala sila magtuo nga tinud-on ang pagtungha ni PRRD, kinsa sa nangaging mga imbitasiyon misaad man tuod nga mopatim-aw, pero wala diay. Apan karon, nga wala pa sila kaayo makapangandam, mitungha hinuon!

Buot nilang balibaran si PRRD. Pero wala kini magpabalibad. Busa, walay nahimo ang Kongreso. Nadayon gyod ang Nobiyembre 13, 2024 nga hearing. Sa ato pa, unang rawon pa lang, midaog na si PRRD. Gilupig ang mga attack dogs ni House Speaker Martin Romualdez, kinsa niadtong nangaging hearings nga wala mopatim-aw si PRRD, labihang konsimisyona ug nakabuhig bahad nga ilang ipa-contempt. 

Giila sa mga political analyst nga grandmaster sa dula sa politika si PRRD. Hinungdan, nga gikan sa pagka-mayor hangtod nahimo natong presidente, wala gyod makatilaw og pilde sa eleksiyon. Ug hangtod bisan dili na siya presidente, nagpabilin ang kataas sa iyang trust rating isip walay makalupig nga presidente kon good governance man sa pagpangalagad ang hisgotan.

Ultimong si US President-elect Donald Trump misaludo man sa war on drugs ni PRRD ug maoy gusto niyang ipasunod didto sa iyang Estados Unidos nga balwarte.

Kontra kaayo ni Trump ang mga adik, korap ug terorista. Sanglit isip usa ka business-minded president, gusto siyag peace and order nga maoy makapa-boom sa negosyo sa nasod.

Kining pagtambong ni PRRD sa EJK House hearing, adunay halawom nga tumong. Gusto mapaabot ug mapakita niya ni Trump kon unsa na ang kahimtang sa Pilipinas niining pagpanimon ni Pres. Bongbong Marcos (PBBM)?

Diin, ang kanhi gipanggukod-gipangbilanggo niyang druglords ug mga sad-ang binuhat, karon gibuhian ug mao pay gihimong testigos aron iduot ug ipabilanggo si PRRD. 

Dili kaha kini makaanig dugang simpatiya ni Trump ngadto kang PRRD? Ug makapasamot kamaot sa imahe ni PBBM nga hagbay rang wala magustoi ni Trump?

Ingon niini mohimog diskarte si PRRD. Puwerte ka inderikta. Pero konektado sa iyang tumong. Atong paminawon kon higala ba gayod si PRRD ni Trump?