Talawan ug inutil
Duha ka taras ni kanhi Presidente Rodrigo Duterte ang nabantang sa iyang pagtambong sa public hearing sa House Quad Committee niadtong Miyerkules: Katalawan (sukwahi sa iyang isog nga sinultihan) ug kainutil (sukwahi sa pagtuo nga makumbinser ug mahudlat pa niya ang katawhan).
Walay bisan sa mga kongresista—gikan sa labing tang-an nga mga beterano ug sa hilaw pa nga mga batan-on—ang nipakita og bisan gamay nga kahadlok niya. Bisan sa naandan nga pangisog—pero namenosan pag-ayo pero wala gyod mahunong nga pamalikas—walay bisan usa nga nipakita og panagana sa pagsukitsukit niya.
* * *
Tungod sa matinahuron, mapailubon, determinado ug walay hunong nga mga pangutana sa mga kongresista sulod sa 13 ka oras, nabisto ang katalawan ni Duterte:
· Niangkon siya og responsibilidad sa tanang nahitabo sa drug war pero wala siyay labot sa mga bulilyaso kay mga polis nga nakahimo og extrajudicial killing ray makasohan;
· Nanghambog siyang nakapatay og daghang sibilyan ug polis pero dili kahingalan og bisan usa ka biktima; ug
· Duphan niyang tanang polis nga naapiki sa pagtuman sa iyang sugo pero wala katabang sa mga napriso, nataktak, nasuspenso ug nakasohan.
* * *
Tungod sa pagbanhaw ni kanhi Senador Antonio Trillanes IV sa seryusong pasangil sa tinagoan nga P2.4 bilyones nga mga deposito sa bangko, nga malampusong napug-ok ni Duterte kay siya nay nagtungkawo sa Malakanyang sukad sa 2016, nabisto ang iyang ka-inutil.
Nga nabantang pag-ayo sa iyang pagbunlot sa mikropono pero wala siyang kahibawo unsay sunod nga buhaton (kay nasumpay nga dili maibot, gawas nga dili kaseguro nga makaabot sa gilingkoran ni Trillanes nga dili masukamod).
* * *
Nipakita siya sa QuadComm uban ang pasidaan nga iyang hukasan ang kahilas sa pag-isug-isog sa taphaw nga mga kongresista nga mobahag rang ikog kon makatilaw na sa iyang bantok nga mga deklarasyon ug mga balikas ug mga insulto.
Pagkahuman sa public hearing dayong tungang gabii, naklaro ang kanhi presidente nga kapoy, masakiton, dili nang katiwas sa iyang mga sulti, maayo gihapong mamanghag, pero ang linihokan mora og nangandoy nga moabot nang adlaw sa panudya. Aron sa kataposan mapaninglan sa iyang kasal-anan. Uban ang panghinaot nga, kay wala na may mokurog sa iyang mga hudlat, hatagan na lang og pahuway.
* * *
- Latest
