Di hustong mamugos

Hugot ang siguridad nga gipatuman sa kapolisan diha sa City Hall human sa nahitabo sa miaging semana ug sa mikaylap nga taho nga moreport pagbalik sa iyang buhatan si dismissed Mayor Michael Rama.

Matud sa kapolisan sa dakbayan nga ang pagpakatap og daghang polis palibot sa City Hall gitumong aron pagsiguro nga di matugaw ang kahapsay ug kalinaw sama sa nahitabo  sumad karon dihang kalit nga mibutho si kanhi city administrator Collin Rosell ug miinsister nga siya maoy tumanon sa mga empleyado kay kuno nahuman na ang ilang unom ka buwan nga suspension ug nga mobalik na sila og report sa trabaho.

Ang pag-insister ni Rosell misampot hinuon sa iyang pagkasikop ug pag-atubang og kasong criminal. Ang kapolisan mikiha ni Rosell og usurpation of authority ug resisting arrest. Human sa gihimo ni Rosell dihay mga taho nga buhaton pud ni Rama ang gihimo sa iyang administrator. Gani dihay mikatap sa social media nga suwat ni Rama ngadto sa Ombudsman nagpahibawo nga moasumir na kuno siya og balik sa pwesto niadto ra untang Nobyembre 11.

Apan hangtud gahapon way Rama nga mibutho sa City Hall. Tingali nahadlok siyang mahisama sa gidangatan ni Rosell.

Dili sab gyud husto nga mamugos si Rama pagbalik sa City Hall bisan sa kamanduan sa Ombudsman nga nagtangtang na niya pagkamayor human makonbikto sa kasong nepotismo. Bisan wala niya dawata ang hukom sa Ombudsman ug ilang gikwestiyon ang paagi pag-asumir ni Mayor Raymond Garcia sa pwesto, apan dunay proseso nga angayang subayon.

Isip abogado sayod si Rama niini ug tingali mao ni hinungdan nganong wala gyud siya mobutho sa City Hall aron pagreport og balik sa iyang buhatan.

Dili sab makaayo alang ni Rama kun mamugos siya nga mobalik sa pwesto bisan way mando gikan sa Ombudsman. Kun akoy Rama, mas maayong mo-focus siya sa kampanya alang sa sunod eleksiyon aron pruwebahan ngadto sa iyang mga kaatbang nga nagpabilin ang iyang mandato sa katawhan bisan sa iyang gidangatan.