Gibabagan sa Philippine Statistics Authority (PSA) ang kapin 1,600 ka birth certificates nga giingon’g nakuha sa mga foreign nationals human nasuta sa maong buhatan nga ang maong mga birth certificate mga peke ug palso diay. Dili ordinaryo nga palusot ang paghimo’g palso nga birth certificate busa dako ang posibilibad nga adunay mga lokal nga mitabang ug mipahigayon ni’ng maong tinonto sa mga langyaw. Ni’ng kahimtanga, inay makabaton na ang hingtungdan’g mga langyaw og Certificate of Live Birth, angay na lang sila hatagan og Certificate of Appearance. Fishkots!
Busdik ang tiyan
Namahayag si Senador Grace Poen ga aduna na’y bag-o ug updated nga poverty threshold nga ipagawas sa NEDA karong Mayo 2025. Mahinumduman nga ang gitakda sa NEDA isip barahan sa proverty threshold kanhi mao ang P60 matag adlaw nga pagkaon nga nakaani og daghang negatibo’ng reaksyon. Bisan tuod ginaingon nga ang kapobrehon sa tawo daw silot sa krimen nga wala niya mabuhat, dili usab tingale himoong tiaw-tiaw kining maong kahimtang. Matud pa sa akong amigo, “Sa pagsuta sa NEDA sa poverty threshold, tingale busdik ang ilang tiyan ug puno ang ilang baba.” Madahaan!
Bag-ong mapa sa namria
Gibutyag sa National Mapping and Resource Information Authority (Namria) nga aduna sila’y gibuhat ug ipagawas sa dili madugay nga bag-ong mapa sa Pilipinas nga naglangkob na sa West Philippine Sea (WPS) isip kabahin sa jurisdiction sa nasud. Dugang pa sa Namria, sukwahi sa mapa nga binuhat sa China, ang mapa sa Namria adunay legal nga basehan. Dako ang kahigayonan nga isalikway ug dili kini tamdon sa China. Panahom pa sa akong amigo, “Kuyaw na hinoon kon maghimo usab ang China og bag-ong mapa diin dili lang WPS ang ilang sakopon, kon dili, apil na gyud ang tibuok Pilipinas tadlas ngadto sa Pacific Ocean.” Fezteleern!
Motubag kay dako na man
Atol sa executive session sa Cebu City Council kabahin sa isyu sa kalangan ug transparency nga naglimin sa CCMC project, gitawag si Corminal sa ubang sakop sa konseho nga “arogante” gumikan sa pamahayag niini nga dili kinahanglanon nga hatagan niya ang konseho sa mga dokumento nga gipangayo sa naulahi. Makapahinumdum kini sa inahan nga nangasaba ug mipugos pagpatug-an sa iyang anak kon ngano nga dugay kini’ng nahiuli. Sa dihang mitubag ang bata sa pangutana sa inahan, giingnan na hinuon kini sa inahan nga, “Motubag-tubag ka na ha, abi kay dako ka na man.” Pagkatoytoy!
Sindikato Sa Pagpakilimos
Nakighinabi ang mga kawani sa Department of Social Services (DSWS) sa dakbayan sa Sugbo ngadto sa mga pangulo sa mga Muslim ug Badjao communities sa tuyo nga agnihon sila pagtabang sa dugay na nga suliran sa pagpakilimos sa kadalanan. Matud pa usab sa DSWS head nga si Portia Basmayor, adunay “handler” kining nagpakilimos nga mga Badjao. Mora’g nasudlan na diay og sindikato ang pagpakilimos busa dili nato masalikway ang posibilidad nga makahimo sila og uban pa’ng matang sa krimen. Haum gayod ang tambag-panultihon nga, “Dili angay ang tawo magpakilimos kon aduna siya’y kagahum sa pag-ugmad.” Muleeng!