Wa gi-remit ang halin sa mga alahas

Dear Atty. Divine,

Namaligya ko og mga alahas og ang akong paryente miangkat nako. Ako ang nag-supply kaniya og mga alahas ug gipatungan lang niya ang presyo niini. Sa bag-o pa, maayo kaayo siyang mobayad. Apan human sa pipila ka buwan  nagsugod na nga ma delay ang iyang bayad hangtud nga karon wa na gyud ko niya mabayri sa worth P100,000.00 nga alahas nga iyang gikuha kanako. Unsa may legal nga lakang nga akong himoon aron mapugos siya sa pagbayad?

Irene

* * *

Dear Irene,

Mamahimo kang mopasaka og reklamo batok sa imong paryente ngadto sa barangay diin siya nagpuyo aron pag-settle sa inyong issue. Mamahimo sab nimo siyang padad-an og demand letter pinaagi sa imong lawyer. Apan kon mapakyas gihapon siya sa pagbayad niini, then imo nalang gyud siya nga pasakaan og kasong Estafa. Basi sa Article 315 (1) (b) sa atong Revised Penal Code mamahimo nga pasakaan og kasong Estafa ang si bisan kinsa nga mo “misappropriate” or mo “convert” sa kwarta o sa goods og uban pang personal property nga anaa kaniya. Sa ato pa, ang kapakyas sa imong paryente pagremit sa halin o pag-uli sa mga alahas makonsiderar nga kalapasan sa maong balaod og mamahimo nimo siyang pasakaan og kasong criminal tungod sa iyang gibuhat. Apan mas maayo nga imo una siyang hatagan og higayon pagsettle sa iyang obligasyon kanimo sa dili ka pa modangop sa korte. Thank you and God Bless.

Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.