Daghan gyud ang nakalitan kay ang mga abogado ni dismissed Cebu City Mayor Michael Rama miadto sa City Hall kagahapon ug mihimo’g press conference didto sa Office of the Mayor.
Si Rama hinuon wa makatambong sa press conference kay mora’g nag-honeymoon pa sila ug sa iyang asawa nga bag-o niyang gipakaslan sa simbahan kaniadtong Oktubre 24.
Mitambong sa presscon sila si Atty. Ernesto Rama, Atty. Johnson Hontanosas, Atty. Homer Cabaral ug si Atty. Collin Rosell, ang kanhi city administrator nga giapil sa unom ka buwan nga preventive suspension sa Ombudsman.
Ang preventive suspension nilang Rama ug Rosell nagumikan sa wa dayon mahatag nga sweldo sa upat ka kawani sa City Assessor’s Office.
Nangangkon si Atty. Rosell nga natapos na ang unom ka buwan nga preventive suspension kanila nga gimando sa Ombudsman, ug nagpasabot nga makabalik na siya sa pagka city administrator.
Apan ang kampo ni Mayor Raymond Alvin Garcia, kinsa gipapanumpa sa regional director sa Department of Interior and Local Government (DILG) isip full-fledged miingon nga dili pa gihapon makabalik sa pagka mayor si Rama, ug si Rosell.
Kini tungod kay samtang napupos na tuod ang unom ka buwan nga preventive suspension, duna pa kuno’y dismissal order nga gimando sa Ombudsman ngadto kang Rama.
Si Rosell kuno dili usab makabalik sa pwesto kay ang iyang katungdanan sa City Hall “coterminous,” nagpasabot nga kon wa na ang nagtudlo kaniya, maputol usab ang iyang serbisyo.
Gani, gihulagway sa mga abogado ni Rama nga ilegal ang gihimo ni DILG-7 regional director Leocadio Trovela nga mipapanumpa ni Garcia isip “full-fledged” mayor nga wa gani ma-serve ngadto ni Rama ang order sa Ombudsman.
Tungod niini, si Atty. Cabaral nga usa ka retiradong regional director sa National Police Commission (Napolcom), mipasaka og mga kaso batok ni Trovela, apil na si Garcia ug laing opisyal sa City Hall.
Ang DILG maoy mimando ni Garcia nga manumpa na isip full-fledged mayor kay na-served na kuno ang order sa Ombudsman ngadto ni Rama.
Apan matud ni Atty. Rosell nga gipangayoan nila ang DILG og “proof of service” nga nakadawat gyud si Rama sa desisyon sa Ombudsman sa kasong nepotism, wa kini makahatag.
Ang City Hall dunay city administrator nga tinudlo ni Raymond, samtang si Atty. Rosell miingon nga mo-asumier na usab siya pagbalik sa pagka city administrator.
Kon mao na, duha ang city administrator? Nindot kaayo ni nga tutokan pag-ayo ang mga panghitabo karon sa Cebu City Hall, apan si Rama ingon sa wa man magdali nga makabalik kay tua pa man gani kuno sa laing nasud.