EDITORYAL - Cebu kinaham sa mga kandidato

Moabot sobra kwatro milyones ang rehistradong botante sa tibuok Central Visayas, apan ang kapin tulo ka milyones niini, naa sa isla sa Sugbu.

Tungod niini, siguradong modagsa sa Central Visayas ilabi na sa Cebu ang mga nangambisyo og posisyon sa Senado.

Dili hinuon kini kahibulongan tungod kay kaniadto pa usa gyud sa rumbohon sa mga gustong makadaog sa nasudnong posisyon ang Sugbu tungod sa kadaghan sa botante niini. Gani dunay mga estorya kaniadto pa nga kun makuha sa kandidato ang mayoriya sa Sugbu, dako kaayo ang porsiyento nga modaog kini sa gidaganan sa national elections.

Gani niadtong nanumpa si kanhi presidente Gloria Macapagal Arroyo, dinhi niya kini buhata sa atubangan sa Cebu Capitol. Agi kini og pagpasalamat ngadto sa mga Sugbuanon sa suportahang gihatag kaniya.

Silang kanhi presidente Benigno Aquino III, Rodrigo Duterte ug bisan si Presidente Ferdinand Marcos Jr. gisuportahan sa kadaghanan sa mga Sugbuanon.

Nagpasabot lang nga bisan kinsang kandidato sa national elections kun paluyohan gani og mga Sugbuanon dako ilang tsansang makadaog.

Apan sa samang higayon, kun ang mga Sugbuanon masuko o masilo gani og nasudnong kandidato, siguradong dili nila kini suportahan sa eleksyon.

Angkunon man o dili, sa mga Sugbuanon lang nag-amping ang mga kandidato. Dili mosalir dinhi ang kandidatong magpasagad lang og tabi tungod kay sensitibo ang mga Sugbuanon ilabi na kun maapektahan kini.

Busa, gamiton unta sa mga Sugbuanon kining maong gahum pagpalingkod og mga angayan ug duna gyuy kapabilidad nga pamunoan ang nasud.

Ug mopahapla og mga kandidatong dili kasaligan kun pakupton og kwarta . Mga kandidatong nagsalig lang sa ilang pagkasikat, impluwensyado, pulos pagarpar ug walay pagtahod sa balaod ug sa proseso.

Nagpasabot sab kini nga ang nagkahiusang boto sa mga Sugbuanon makaapektar gyud sa kaugmaon sa Pilipinas, busa angayan nga kini balaanon ug dili usikan ini og panahon na sa pagbotar.