Gipahibawo sa anti-mendicancy board sa syudad sa Sugbo nga hugot nilang ipatuman ang “no permit, no caroling” policy dinhi sa dakbayan nunot sa nagsingabot nga Pasko.
Kini gitumong aron malikayan ang mga manaygon diha sa dalanan nga naghatag og dakong piligro sa ilang kinabuhi ug sa mga motorist. Nunot niini, gimando ni Mayor Raymond Alvin Garcia ang higpit nga pagpatuman sa anti-mendicancy ordinance sanglit ang pagpanaygon diha sa kadalanan maisip nga matang sa pagpakilimos.
Ubos sa ordinansa gidili ang paghatag og limos diha sa kadalanan. Si bisan kinsa nga masakpan mamahimong makabayad og multa o ba kaha pugson sa paghimo og community service.
Mao ni hinungdan nganong buot ang syudad nga mokuha gyud og permit ang mga manaygon aron sayon ang pag-ila sa lihitimong manaygonay gikan sa mga nagpakilimos. Ang permit libre ug way bayad. Mahimo ni nga makuha didto sa City Hall o ba kaha pinaagi sa online, sigun sa pahibawo sa mayor.
Apan bisan pa sa pahibawo nga libre ra ang permit sa pagpanaygon ug sayon ra kining makuha, daghan gihapon ang nagbagulbol. Dunay mga nikwestiyon ngano kunong lisud-lisuron gyud sa syudad ang mga lumolopyo nga tagsa ra man mahitabo ang Pasko.
Alang nako dili paglisud-lisod ang pagpalukat og permit sa mga buot manaygon. Lisod ba gud ang pagkuha og permit nga libre?
Ang nakadaot sa ubang mga nanaway mao nga duna silay nagpahipi nga motibo sa politika. Gusto nilang sugnoran ang publiko aron maglagot sa kagamhanan sa syudad sa pamasin nga makabintaha sila sa umaabot eleksiyon.
Dili ingon niini ang matang sa pamolitika nga gipaabot sa katawhan gikan sa mga politiko nga nagtakoban sa saad sa kausaban kun sila mapili sa pwesto. Ang pagsugnod og kalagot sa katawhan sa pamasin nga makapabor batok sa mga incumbent nga opisyal usa ka kinaiya sa TRAPO.
Ug sa kadaghan sa problema nga giatubang sa syudad, ang TRAPO maoy unang tawo nga di nato gustong mohupot og katungdanan. Makaayo sa kadaghanan ang pagpatuman sa “no permit, no caroling” policy busa angayan ning suportahan inay sawayon.