Dugang pa ang pagpangandam

Gikinahanglan nga dugangan pa ang pagpangandam alang sa moabot nga bagyo ingon man sa pagpahibawo sa gikusgon sa hangin, gidaghanon sa uwan nga dala ug sa epekto niini. Kini ang gisulti ni Presidente Bongbong Marcos.

Gihulagway sa Presidente nga ang mga bagyo karon dili na susama kaniadto. Gihimong basihanan sa pahayag sa Presidente ang mga nahitabo sa ubang kanasuran sama sa Espanya.

Tinuod, grabe na kaayo karon ang kadaut nga ibilin sa bagyo ilabi na ngadto sa kinabuhi ug panginabuhi sa tawo, inprastraktura ug agrikultura. Wala pay labot niini ang epekto sa ekonomiya.

Sugyot nako sa gobiyerno, bisan wala ko pangayo-i niini, nga kinahanglan nga tan-awon ang kinatibuk-an nga suliran ug dili lang ang bahin niini ang hatagan og kasulbaran.

Ang mga namatay tungod sa bagyong Kristine, namatay kay nalumos sa tubig nga milunop ug mibaha ug natabunan sa midahili nga yuta nga mihumok  tungod sa kusog nga ulan.

Ang tubig nga milunop ug mibaha gikan kini sa mga naupaw na nga kabukiran nga inay kay tamnan og kahoy gipangtukoran na hinuon kini og kabalayan. Bisan asa nga dapit sa Pilipinas ang mga dapit nga gipuy-an sa kabagang katawhan susama sa nahimotang sa usa ka planggana. Gitung-an kita sa dagat ug bukid busa ang tubig ug dagat mag-abot sa atong gipuy-an. Kun walay makaharang niini mangalumos ta.

Ang mga subdivisions nga gipangtukod sa kabukiran kabahin kini sa kauswagan pero kinahanglan nga dili unta ikompromiso niini ang kinabuhi, inprastraktura ug agrikultura. Ang mga subdivisions sa kabukiran dako og gikatampo sa mga pagbaha, lunop sa ubos ug pagdahili sa yuta  tungod kay ang yuta ug kakahoyan nga makapugong unta sa tubig gipamutol ug sementado na. Pun-an pa sa mga proyekto nga pang-inprastraktora sama sa flood control nga gigastoan sa gobiyerno og hapit moabot sa trilyones ka pesos pero dili nimo makit-an.

Hangtod dili tan-awon sa gobiyerno ang kinatibuk-an nga suliran, magpabilin nga duna gihapon malumos sa lunop ug baha  ug matabonan sa modahili nga yuta.