Pagkagusbat sa Senado
Nagtakiang daan ang Senado sa pagkara-kara og imbestigar sa extradjudicial killings (EJKs) ni kanhi Presidente Rodrigo Duterte. Kay gitugotan ang labing dagkong imbestigahunon nga maoy mangimbestigar. Ug imbes tibuok Senado ang mohimo, gidalidali pagtukod ang subcommittee nga walay gahom pag-contempt sa magbugalbugal sa ilang lagda.
Nahagsa ang bisan unsang kaligdong nga nahibilin sa Senado dihang ilang gisurender ngadto sa kanhi presidente ang pagkontrolar sa public hearing. Nga giputos niya sa naandang mga balikas, mga bugalbugal, mga panghudlat, mga panginsulto ug, nakatag-an ka, mga bakak (apil na sa iyang kaugalingong edad).
* * *
Napugos lang ang Senado paglusad og ilang kaugalingong imbestigasyon dihang nipahibawo silang Senador Bato dela Rosa ug Senador Bong Go, duha sa gipasanginlang mga utok sa lapad nga binayranay sa EJKs, nga mangimbestigar sa mga pasangil batok nila.
Aron paglikay sa eskandalo, naghimo si Senate President Chiz Escudero og kaugalingong binuang. Niinsistir nga ubos sa lagda, Senate Blue Ribbon Committee ni Senador Pia Cayetano ray makapangimbestigar atol sa bakasyon. Kay dili man interesado si Cayetano, si Senate Minority Leader Koko Pimentel dihadiha niyang gitudlo pagpangulo sa dihadiha nga subcommittee.
* * *
Gisalikway ni Pimentel nga supak sa mga lagda ang tanyag sa House Quad Committee nga maghugpong ang ilang imbestigasyon. Niinsistir sab nga magsugod sa uno imbes nga mogamit sa mga testimoniya ug ebidensiya nga nahipos sa House.
Human nipasalig nga mas organisado ang imbestigasyon kay unahon pagpaminaw ang mga pasangil, nilubay si Pimentel sa pag-insistir ni dela Rosa nga si Duterte ang unang pasultihon pagpanalipod sa iyang kaugalingon sa wala pa patinguga ang mga biktima sa EJKs.
* * *
Inay barawon si Duterte sa pagpakauwaw sa Senado, nisugot silang Pimentel ug kaubanan, gawas ni Senador Risa Hontiveros, nga giyatak-yatakan sa kanhi presidente ang tanang mga lagda sa ligdong ug makiangayong imbestigasyon.
Diha pa gani higayon nga gitugotan ni Pimentel si Duterte, ang resource person, pagsukit-sukit ni dela Rosa, ang senador nga nitubag isip iyang kanhi hepe sa kapolisan. Human sa hearing, nanghambog si Pimentel sa iyang mga higala nga gipatuyangan niya si Duterte maong nikumpisal sa pagsugo sa EJKs. Lalisunon pa kon si Pimentel mat-an ba o talawan gyod. Dili malalis ang pagkagusbat sa institusyon.
* * *
- Latest
