Dakong isyu na usab karon ang inbestigasyon sa extrajudicial killing sa Kongreso (Senado ug Ubos Balay Balauranan) ilalum sa war on drugs sa nakalabay nga rehimeng Rodrigo Duterte.
Atong nakita nga gigisa sa Kongreso ang mga personahi sa war on drugs ni Duterte. Lakip na ang kanhi presidente, kinsa wala makaipsot sa mga rapidong batikos ni Senador Risa Hontiveros.
Dili usab nato mabasol ang ubang sektor nga hangtud karon nagpangagot pa sa ilang ngipon gumikan sa giingong walay habas nga pagpamatay sa mga pulis panahon sa war on drugs.
Apan bisan pa man sa mga pagbatikos gikan sa mga human rights advocates, ang gubat batok sa druga nagdala og kahusay ug kalinaw sa ubang bahin sa Pilipinas.
Ang administrasyon ni Duterte nagpatuman og hugot nga mga lakang aron mapukan ang problema sa druga. Ang mga operasyon batok sa mga drug syndicates ug mga pusher nagresulta sa dakong pagkunhod sa krimen nga druga ang hinungdan.
Ang mga pulis ug mga sundalo nga nagpatuman sa kampanya batok sa druga nagpakita og dakong determinasyon ug kaisog. Ang ilang mga operasyon nagdala og dakong kalampusan sa pagdakop ug pagpatay sa mga lider sa drug syndicates.
Kini naghatag og mensahe nga ang gobiyerno seryoso sa pagpakigbatok sa droga ug dili magduha-duha sa pagpatuman sa balaod.
Bisan pa man sa mga pagbatikos, dili ikalimod nga adunay maayong resulta ang kampanya batok sa druga. Ang mga datos nagpakita nga ang krimen mikunhod ug ang mga komunidad nakasinati og kalinaw.
Ang administrasyon ni Duterte nagpakita nga ang pagpakigbatok sa druga dili lang usa ka isyu sa seguridad. Ang mga lakang batok sa druga nga ilang gipatuman, puwera lang kadtong mga napagang inosente, nagdala og dakong kaayohan sa mga komunidad ug sa nasud sa kinatibuk-an.