Nov. 2. Puno na usab ang atong mga sam-ang sa mga buwak ingon man mga dinagkotang kandila. Naay mga pamisa ingon man daghang mga tawo karon atong makita. Ang matag tuig nga kasaulogan nagkinahanglan man og matag adlaw nga pagpamalandong.
Atong sud-ongon ang mga lubong nga mamahimong atong puloy-anan pohon. Atong sud-ongon ang mga lubong nga wala maduaw nga tingali gumikan sa kamatuoran nga dili na sila mapuslan sa mga buhi mahimong malubong na lamang sa kalimot.
Usahay ang kinabuhi ingon ini man. Daghanan sa mga tawo ang nahigugma lamang sa atong mga kamot apan wala mahigugma sa atong kasingkasing. Apan bisan pa man niana dili ta angayang mabalaka sanglit anaa ang Dios nga maoy tinubdan sa kinabuhi.
Ang atong kamatayon maoy atong pagkahimugso padulong sa kinabuhing dayon. Atong iampo ang tanang kalag sa purgatoryo nga unta sila pud unta mangaliya alang kanato. In pace requiescat! Amen.