Balik na sad sa realidad gikan sa taas taas nga bakasyon subay sa pagtimaan sa adlaw sa mga mitaliwan sa laing kalibutan, gustohon man nato nga lugwayan ang bakasyon. Apan gikinahanglan na natong magpadayon sa atong nabiyaan nga gimbuhaton.
Kamas na pud kita sa atong trabaho, eskwela ug uban pa aron naa kitay ikasuporta sa atong mga gipangbuhi kay lagi wala may mohatag nato og kwarta kong maglingkod lang kita.
Lami unta nga magpahayahay sa atong baga sa huyohoy sa hangin sa probinsiya. Apan kong magsige nalang basin hangin lang pud atong hanggabon kong matinapolan sa atong pagpanikaysikay. Maayo unta kong sapian ta kay pwede ra, bisan man gani ang ang adunahan magkugi man gani kita pa kaha nga mga kabus.
Bitaw balikon nato sa pagtan-aw ang kasikas sa mga sam-ang atol sa adlaw sa mga minatay. Hapsay ug malinawon ra diin ang mga tawo masunoron sa mga lagda sila na mismo ang naghimo sa angayan ug dili angayang buhaton. Hinuon ubos sa superbisyon sa mga otoridad ug kooperasyon sa tanan nagmalinawon sa kinatibok-an ang kasaulogan.
Sa mga terminal ug pantalan hamugaway ra man ang kahimtang walay nagdasok nga mga pasahero ug wala usay nag-overloading nga mga barko bisan og wala pa sila imonitor sa coastguard. Gani pagka Nobiyembre 1 naman nag inspection ang PCG sa mga pantalan.
Nag-mature na ang mga tawo karon dili sama kaniadto nga walay mga buot dili mopatuo, dili tanan apan naa gyuy nagpabadlong. Nakamatngon na ang mga tawo karon nga ang pagsunod sa lagda maggikan sa atong kaugalingon dili tungod kay nahadlok kita sa mga otoridad. Kong mahimo nato kini kita ra usab ang maluwas gikan sa peligro nga posibleng masugatan.
Unta ingon niini ang pamatasan nga tamdan natong tanan wala gyuy problema nga mahiaguman. Basta gihimo nato ang pagpaneguro alang ra usab sa atong kaluwasan.
Unya kayod na sad ta kay mao kini ang kamatuoran bawnon nalang nato ang matam-is nga kasinatian sa atong pagbakasyon nga natilawan nato ang kaharuhay gamay sa dapit nga atong gigikanan.