Ay'g palingla sa survey

Kun basihan ang resulta sa hapit kada-buwan nga survey sa usa ka grupo nga bag-o lang mitumaw ug kadudahan pa ang credential, makaingon gyud ka nga labihang kugihana sa mga kongresista sa Sugbo tungod kay hapit tanan nila "top performers".

Ambot unsay gibasihan sa survey aron maisip ang usa ka kongresista nga "top performer"?

Sa gidaghanon ba sa balaod nga ilang nahimo o sa kadaghan sa mga proyekto nga gipaskinan sa ilang mga dagway diha sa ilang mga distrito?

Kun padaghanay sa balaod nga gipanday ang gibasihan, gawas lang sa usa o duha ka mga kongresista sa Sugbo, kasagaran nila wala gyud ta kadungog nga dunay importanteng balaudnon alang sa kinabag-an nga ilang giduso.

Wala sab ta makadungog nila nga aktibong misalmot sa mga debate didto sa hawanan sa Kongreso isip atong mga representante sa mahinungdanong mga isyu sa nasud.

Sa laktod kasagaran sa atong mga kongresista dinhi membro sa "committee on silence." Kana bang moabli lang ang baba og manghuy-ab ug hilig og pasinaw sa bangko.

Ang nag-unang responsibilidad sa mga kongresista mao ang pagpanday og balaod alang sa kaayohan sa kadaghanan, labi pa sa mga molupyo sa ilang distrito. Ang pangutana, pila man ka balaod ang gipanday sa inyong kongresista aron siya maisip nga "top peformer"?

Dunay uban daghan tuod og proyekto, apan susiha kuno kinsay nangontrata sa ilang proyekto? Dili kaha ang kompaniya ra pud nga gipanag-iya sa inyong kongresista?

Kun mao negosyo diay tumong sa inyong opisyal, dili ang pagpanerbisyo. Busa angayang di palingla ang publiko niining nagpusot-pusot ron nga resulta sa survey.