Pagpamalandong sa Malangkubong kaayohan
Ang atong simbahan nagpahinumdom kanato nga dunay tulo ka dagway ang simbahan.
Ang Simbahang Mahimayon:
Nobiyembre 1 na usab. Ang tukmang panahon diin atong gipasidunggan ang katilingban sa mga Santos nga human masuwayi napamatud-an nga matinud-anon sa Ginoo. Gitawag usab kini og Church Triumphant. Sila kadtong mga nakalahutay sa tanang mga pagsulay sa ilang panaw sa pagtuo ug sa ilang panaw dinhi sa kalibotan. Ato silang gisangpit sa kanunay aron kanato mangilaba ngadto sa Dios nga ilang gisimba.
Ang Simbahan nga Nagpanaw Pa:
Gitawaag usa kini og Church Militant. Ang simbahan nga nagpanaw pa ning kalibotan ug ang maong simbahan mao kita nga nia sa kalibutan sa mga buhi. Atong dakong hagit nga sa atong panaw mamahimo natong tinguhaon ang kinabuhing balaanon segun sa atong kahimtang.
Simbahan nga Nag-Antos:
Sila kadtong mga kaigsuonan nato nga gumikan sa tawhanong kahuyangan ang nagkinahanglan pang hingpiton pinaagi sa kalayo nga makapurga. Sila kadtong anaa sa purgatoryo nga human malinisi pinaagi sa maong kalayo ang matugotan nga makasulod sa Gingharian. Dili sila makatabang sa ilang kaugalingon, kondili kinahanglanon nga mamahimo kitang magmanggihatagon alang kanila pinaagi sa atong mga misa ug pag-ampo. Bisan kun dili sila makatabang sa ilang kaugalingon apan makatabang sila kanato pinaagi sa ilang mga pag-ampo ug pangilaba alang kanato.
Dili mahinungdanon kun malakip kita sa talaan sa mga santos nga gimantala sa Simbahang Katoliko o dili. Ang mahinungdanon atong higugmaon ang Dios samtang anaa pa kita dinhi sa yuta. Atong sination ang langit pinaagi sa paghimo og kaayohan dinhi sa yuta. Ang mga santos tinuod nga mga tawo diha sa atong kasaysayan atong awaton ang ilang panig-ingnan. Ang tinuod nga Halloween dili mahitungod sa mga ungo og mga daotang mga espiritu.
Ang Halloween mahitungod sa mga santos busa matarong lamang nga imbis atong bistihan og bisti sa mga demonyo ang atong mga Kabataan atong pagahimoon ang pagbisti kanila og mga bisti sa mga santos.