Nalipay ko kay gipatuman karon sa kagamhanan sa siyudad ang Asphalt storm, pinaagi sa pag-aspalto sa mga karsada nga pwerte ka libaong.
Usa niini ang karsada nga gikan sa IT Park paingon sa Barangay Apas nga sa dugay’ng higayon nagsakripisyo ang mga motorista, ug apil ko nga usahay anha moagi.
Karon, sinaw na kaayo kay giaspalto na sa administrasyon ni Mayor Raymond Alvin Garcia pinaagi sa pagpaningkamot ni Apas Barangay Captain Jingjing Cabigon.
Ang kauban nako sa Cebu City Traffic Management Board nga si Mike Jo maayo kaayo mangita og mga dapit sa karsada nga angayang aspaltohon.
Duna ko’y dapit nga nakita nga pwerte kalawom sa lungag nga mabuwasot gyud ang ligid. Naa kini sa eskina Rosal Street ug Escario Street.
Unta, mahatagan dayon kini og pagtagad ni Cebu City Councilor Jerry Guardo kay siya man ang gitugyanan ni Mayor Garcia pag-supervise sa asphalt storm project.
* * *
Nakabisita ko sa opisina sa usa ka kandidato pagka mayor ug nakita nako nga pwerteng daghana nga nangayo’g tabang. Lainlaing problema ang gusto nilang patabangan sa politiko.
Sagad nagbitbit og mga dukomento nga gikan sa ospital ang nangayo’g tabang, ug nasaksihan sab nako nga ang politiko dili makabalibad og mapugos paghatag og kwarta.
Sa kapin oras nako nga pag-obserbar, nakapanglingo-lingo ko kay bisan tuod og tag P500 ra ang gihatag sa maong politiko sa mga nangayo’g tabang, apan kon imong kwentahon, dako na kaayo ang kantidad kay daghan man.
Diha pay naproblema sa kuryente ug gisultihan ko sa politiko nga gipalitan niya’g ekipo gikan sa online dealer aron maoy gamiton sa VECO nga itaod kay gusto man sa nangayo’g tabang nga duna siya’y kaugalingong kwentador.
Ang nakapait pa gyud kay bisan og migasto na ang politiko, ang bayot nga nangayo’g tabang mao pa ang nagpasuko-suko. Sus, paita sa maong sitwasyon, ug nagpailob lang ang politiko.
Mao na ang makapait kon modagan ka og elective position dinhi sa nasud kay pangayoan ka sa mga tawo, ug kon dili ka mohatag mahimo kang bati, ug hulgaon nga dili botohan.
Kon modaog ang politiko unya dako na kaayo og nagasto sa paglansar niya sa katungdanan, posible nga matintal siya nga bawion ang iyang nagasto gikan sa mga komisyon sa lainlain nga proyekto.
Para sa mga mangayo’g tabang, kutob na lang tingali sa pagpangayo’g tabang nga mahatag sa kagamhanan, ug kon ang politiko na ang motunol og kwarta gikan sa iyang bulsa, dili na usab maayo.
Diha ko nakaingon nga pwerteng dakoa gyud sa gasto kon magpapili ka og elective position sa kagamhanan.