Ang bisyo dili gyud magbunga og maayo. Sama nalang niining mag-live in partner nga nasikop kay nangilad og restaurant sa dakbayan sa Sugbo niining bag-o lang. Hilabihan ka dako ang ilang nabulsa gikan sa biktima nga niabot og dul-an sa P300 mil.
Dili lang kausa nila gihimo kon dili kadaghang higayon. Gipaagi sa online ang ilang order ug aron molampos sila ilang gi-edit ang online proof of payment ug dinanghag pud ang management sa sinugdanan wala susiha nga dakong mga kawatan ang ilang ka transaksyon.
Gipahigayon ang entrapment operation sa kapolisan ug nasakpan ang manag live-in kinsa nagluhodluhod gyud ang lalaki aron sila pasayloon.
Apan desidido man ang biktima nga mopasaka og kaso pero makagawas ra gihapon kay bailable man ang kaso.
Dihang giestorya ning duha ka suspek mora’g wala pa sila katugpa kay tulibagbag ang inistoryahan nga matud pa sa uban resulta sa ilang pagka gumon sa bisyo. Matud sa mga nakaila kanila nga mga professional man ni sila gani dunay position sa usa ka kompaniya nga kanhi sila nagtrabaho ug maayo usab ang ilang kabutang.
Nganong nahitabo man nga naghimo sila og pagpangilad?
Ang inyong tubag mao sad ang akong tubag nga mao ang bisyo ug aron dunay ikagasto sa ilang bisyo mangilad nalang.
Laing mipatim-aw nga reklamante mipadayag nga kaila niya ang mga suspek kay kanhi amo sila sa inahan sa reklamante.
Dihang nihangyo sila nga moestar og pipila ka adlaw, giatiman nila nga sama sa senyorito ug senyorita. Apan wala nila kini suklii og katarong inay gibiktima usab nila ang pamilya nga ilang gisak-an.
Nangutang og mga paninda ug kwarta apan wala bayari. Dihang namiya sila sa gisak-an nagbilin kini og daghang hugaw sa kwarto nga gihimo nilang CR kuno maong nabaho ang balay nga ilang giestaran.
Kanhi mga maayong tawo sila apan nausab og kalit nga sila mismo ang nagtukmod kanila sa kaalaotan.
Nadakpan naman sila, unta tinud-on nga ipadayon ang kaso hangtud makonbikto aron motagam ug magsilbeng example sa mga tawo nga dili magtinonto.
Leksiyon usab kini sa uban nga dili mosalig ilabi na sa online community diin daghan kaayo ang mangingilad nga nagpaabot lang kanus-a sila makalamiktima.
Unta nagpamisa Nobiyembre1-2 anaa sa misa
Ang Archdiocesan Shrine of Our Lady of Guadalupe de Cebu o Guadalupe Parish Church mopahigayon og daghang misa ning umaabot Nobiyermbre 1, Biyernes, All Saints' Day ug Nobiyembre 2, Sabado, All Souls' Day aron makahatag dakong kahigayonan sa tanan nga makatambong ug makahalad-makalitok og mga pulong pag-ampo alang sa kaluwasan sa ilang mga minahal sa kinabuhi nga atua, mitaliwan na sa laing kinabuhi.
Ug ang mass schedule mao kining mosunod: Alas 6:00 sa buntag, alas 8:00 sa buntag, alas 10:00 sa buntag, alas 4:00 sa hapon, alas 5:30 sa hapon ug alas 7:00 sa gabii.
Usab, adunay pari nga magmisa didto sa Calamba Cemetery kada ala-1:00 sa hapon sa nahisgotang mga adlaw (Nobiyembre 1 ug 2).
Sa ordinariyong mga adlaw, matag Lunes migahin ang simbahang Katoliko og mga misa alang sa mga patay. Mao nga kada Lunes daghan kaayong magpamisa sa simbahan. Gikan sa alas 5:30 sa hapon ngadto na sa alas 8:00 sa gabii, nagtipun-og ang mass intentions nga basahonon sa lector. Kana lang 5:30 pm mass, alas 5:00 pa lang sa hapon, sugdan nag basa sa lector. Pero bisag sama pa kini sa jet plane kakusog mobasa, may higayon nga dili siya katiwas. Kay milapas na sa 5:30pm ug ang pari magmisa na.
Samot na, niining Nobiyembre 1 ug 2, seguradong modoble ang gidagahanon sa magpamisa.
Apan subo kaayo palandungon nga base sa nangaging katuigan, diyotay ra intawon ang manimba. Hain na man diay ang mga nagpamisa? Nganong nagpamisa man, nga wala man diay silay panahon sa pagtambong?
Presensiya ug pag-ampo sa mga tagtungod ang gikinahanglan sa mga patay ug maoy ikalipay sa atong Ginoo. Ug dili ang salapi nga gibayad para sa mass intentions.
Angay hinumdoman, dili sama sa pandesal ang pag-ampo nga mahimo ka rang mamalihug sa pagpapalit ug maimo gihapon.
Ang kaluwasan nga giandam-tanyag sa Ginoo, libre. Walay bayad. Basta, ikaw mismo ang nangayo-naningkamot sa pag-angkon niini. Busa, mga kaigsuonang Kristiyanos, kon kamo nagpamisa alang sa mga kalag ning umaabot Nobiyembre 1-2, hinaot unta nga inyo gyod kining matambongan.
Ayawat na lang, nga malipay ang mga gipamisahang kalag, kinsa nanimba usab ug nangandoyng ikauban ang inyong presensiya.
nga paagi