Mitambong gyud si kanhi presidente Rodrigo Duterte sa Senate Blue Ribbon Committee hearing kagahapon kabahin sa drug war ubos sa iyang administrasyon.
Si Duterte, walay lipud-lipod nga miangkon nga duna gyud siyay kamandoan sa pagpapatay sa mga drug suspects ug gikumpirmar niyang duna gyuy death squad apan gihimakak niya nga kini mga polis kondili mga adunahan nga gustong mahipos ang mga kriminal ug nalambigit sa ilegal nga drugas dinhi sa nasud.
Ang kanhi pangulo miingon nga dili siya mangayo og pasaylo ug dili sab siya mohimakak o molihay sa responsibilidad kay para niya kinahanglan niya kining buhaton. Sa pagsugod sa hearing murag og seryuso kaayo ang palibot tungod kay gawas ni Duterte, imbitado sab si kanhi senador Leila De Lima kinsa nilingkod sa lamesa diin sab naglingkod ang kanhi pangulo.
Ang pag-angkon ni Duterte nga gimando gyud niya ang pagpapatay sa mga drug suspects, apan gihimakak niya ang kabahin sa reward system nga una nang gibutyag ni kanhi Police Colonel Royima Garma ug kanhi Napolcom chairman Edilberto Leonardo sa buwag nga House Quad Committee Hearing.
Kaning mga gipang-angkon ni Duterte mahimong makapahinay sa gipangusgan nga inquries bahin sa war on drugs, apan pwede sab nga mao kini sinugdanan nga maukay pa ang uban ug daghan na unya ang mangisog sa pagtug-an sa ilang mga nahibaw-an.
Si Duterte miingon nga siyay manubag aning tanan ug dili niya gusto nga manubag ang mga polis sa kamandoang nagagikan kaniya.
Dili pa kini angay ikalipay sa mga nalambigit niadtong mga kwestyonableng pagpatay o kamatayon sa mga drug suspects atol sa war on drugs, kay dili man si Duterte ang aktwal nga nihimo sa kalapasan.
Ang pangutana, makonsiderar ba nga legal ang pagbuhat og salaod tungod kay kini gimando sa ilang labaw? Angay ba kining sundon? Dili ra ba tanang legal makapasar sa moralidad.
Dili ingon niana ang balaod ug hustisya. Dili mahimong siya maoy manubag sa mga krimeng dili siya maoy direktang nagbuhat, kay dako kining kalapasan sa iyahang katungod.