Magsilbi untang leksyon sa tanan, ilabi na sa mga kabatan-onan ang nahitabo sa 19-anyos nga dalagang tinun-an sa Cebu Technological University Main Campus nga nag bomb joke.
Ang social media dako kaayo og gamit para sa tanan, apan kun iresponsable ang mogamit niini, makadaut kini sa uban ug makaguba og kaugmaon.
Ang pagtudlo sa mga bata bahin sa social media kinahanglang magsugod sa balay, samtang sila mga gagmay pa. Kay dili ikalimod, nga mao na kini karon ang bag-ong estilo sa kinabuhi sa tawo.
Pwede kining tinubdan sa mga impormasyon, basta mag-amping lang ug dili basta tuohan ang tanan kay nagpasad sab ang mga fake news, misinformation ug disinformation sa social media, depende kun as aka motan-aw.
Mao nga dako kini og impluwensiya sa kinabuhi karon sa mga kabataan. Sa balay palang, kinahanglang kanunay ang pahimangno sa mga ginikanan, bahala pa og sila mismo dili suhito o walay kabangkaagan sa social media.
Ang importante, matudloan kanunay ang mga bata kung unsay maayo ug dili maayo aron sa ingon kun sila mogamit og social media maghunahuna sila og maayo kun husto ba kini o dili ayha pa sila mag-post. Kun tuohan ang pangangkon sa maong tinun-an nga dunay laing tawo nga nigalgal o nagsugo kaniya pag-post sa maong bomb threat, kinsa man kaha ning tawhana o mga tawhana? Unsa may ilang makuha kun ilaha kining buhaton.
Dili ba kaha maong gibuhat kini sa dalaga kay wala siyay laing lingaw? Dunay mga nagduda o mga pangagpas sa mga tawo nga basin wala kini makatuon sa iyang leksyon.
Kay nianang adlawa nga gi-post sa social media ang bomb threat ting-midterm exams diay kadto ug nakanselar ang klase tungod niini. Daghan na hinuon ang nahasol sa maong hitabo.
Ang National Bureau of Investigation maoy nakasakop kaniya gamit gihapon ang iyang gi-post nga bomb threat.
Angay hinumdoman sa tanan, nga karong duna nay paspas nga teknolohiya dili na lisod sa mga otoridad ang pagtultol kun asa ang ilang mga gipangita, busa mahimo untang responsable ang tanan diha sa social media.