Unsay buhaton kon ubos sa minimum ang sweldo

Dear Atty. Divine,

Aduna koy pangutana labot sa among minimum nga suhulan. Usa ko ka construction worker sa usa ka construction company. Nagtrabaho ko sa among kompaniya sud na sa lima ka buwan. Apan hangtud karon, ang akong sweldo nga gidawat ubos sa minimum nga suhulan. Matud pa sa akong kauban below minimum daw ang sweldo basta helper lang. Kapoy biya kaayo magtrabaho sa construction ilabi na kon panahon sa ting-init, unya ma discourage ka inig tingsweldo na kay ang imong sweldo nga madawat dili makaigo sa mga galastuhan sa imong pamilya. Unsay angayan nako nga buhaton? Daghang salamat. -- Ruben

Dear Ruben,

Ang matag lugar adunay minimum nga sweldo nga gi set ang Regional Tripartite Wages and Productivity Board kon RTWPB ug obligado niini nga motuman ang mga pribadong kompaniya. Apan adunay daghang employer nga di motuman sa minimum wage law. Aron mahunong na kining pagpangabuso nga gihimo sa inyong kompaniya, mas maayo nga moreklamo ka sa DOLE ug imong i-report kining wa pagtuman sa minimum nga suhulan sa inyong construction company. Imong i-submit sa Dole ang kopya sa imong payslip to prove nga below minimum ang imong gidawat. Mas maayo nga imo sab sutaon kun kompleto ka ba sa mga mandatory benefits sama sa SSS, PagIbig ug PhilHealth aron ilakip sab kini nimo sa pagreklamo. Ayaw kahadlok sa pagbarug sa imong katungod aron dili ka abusuhan niining mga employer nga wa magtan-aw sa sitwasyon sa ilang mga trabahante nga pamilyado intawon. Thank you and God bless. -- Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo