EDITORYAL — Suspensyon sa epekto sa mga klase

Taas-taas ang mga adlaw nga nasuspenso ang mga klase sa mga eskuylahan tungod sa bagyong Kristine nga miigo dinhi sa Pilipinas nin semanaha.

Ang pagsuspenso gihimo tungod sa kakusog sa hangin ug uwan dala sa bagyo. Peligro kaayo kini para sa mga bata ilabi na niadtong mga kinahanglang motabok pa og mga sapa o dagat ug mga bakilid nga kuyaw sa landslides ug flashfloods,  aron makatambong sa klase.

Bisan gani ang mga taga siyudad, peligro gihapon tungod sa mga poste ug kable sa kuryente nga pwedeng mangatumba ug labaw sa tanan ang baha.

Nalipay ang mga ginikanan ug nihangop sa pagsuspenso sa klase kay luwas ang ilang mga anak. Dunay mga tinun-an sab nga nalipay kay lagi makapahuway sila.

Dili lang kining bagyoha ang hinungdan nganong dunay mga suspensyon sa klase tungod kay gihimo na sab kini sa nanglabay nga mga buwan , dili lang tungod sa bagyo kondili tungod gyud sa dautang panahon dala sa low pressure area (LPA) nga nagdala og kusog nga uwan.

Tingali kung tipuon ang tanang mga adlaw nga walay klase tungod sa katalagman, molapas na tingali og napulo ka adlaw.  Anugon ang mga adlaw nga walay nakat-onan ang mga bata tungod kay walay klase.

Maayo lang sa uban, ilabi na sa mga pribadong eskuylahan nga nagpabawon gyud og assignments o ba kaha nag-online classes o modular class anang mga adlaw nga suspendido ang klase kay duna gihapoy leksyon nga makat-onan ang mga bata. Daan nga giplano nga ang unta kapin 200 ka adlaw nga mga adlaw nga magklase ang mga bata, pamub-an og 15 ka adlaw aron dili maabtan ang mga bata ug mga magtutudlo sa grabeng epekto sa ting-init karon nga school year. Apan tungod aning mga suspensyon sa klase, kinahanglan gyud tingali mag makeup classes sa adlaw nga Sabado aron makaapas pa sa mga leksyon ang mga bata.