Pagsukod: Can I have your watch?

Nagpadayon ang dakong gubat sa politika: Bise Presidente Sara ‘Inday’ Z. Duterte batok administrasiyong Marcos.

Sa press conference, Si Inday miasoy. Nanambong sila ni Presidente Bongbong Marcos Jr. (PBBM) og military graduation rites. Adunay batang sundalong migraduwar human molamano ni PBBM, namarayeg: “Mr. President, can I have your watch as my graduation gift?” Nablangko kuno kini. Maong nangutana pag-usab. Unya dihang gitubag, “Mr. Presidente, can I have your watch as my graduation gift?”, giingnan ni PBBM nga “Why? Why I will give you my watch?”

Haskang bukala sa dugo ni Inday nga nakadungog. Naluoy siya sa mi-graduate. Kay kon wala pa lang siya magbaton og respeto, ang iyang relo na lang untay iyang ihatag.

Angay matngonan. May pagka-tricky ang gipangayo sa sundalo. Ang iyang gipangayo dili wrist watch. Kondili, watch! Meaning: dili relo de pulso iyang gipamarayeg. Kondili, ‘watch’ or ‘pagbantay!’ Nga unta matutokan sa commander-in-chief ang kahimtang ug tanang panginahanglan sa kasundalohan. Nga unta ang budget para niini dili kawaton-kurakoton sa buayang opisyales.

Pero unsay gitubag ni PBBM? “Why I will give you my watch?” Diin nagpasabot, nga wala diay siyay love, care and mercy ngadto sa iyang kasundalohan. Hinungdan, nga nakagisi kini sa kasingkasing ni Inday, kinsa adunay dakong gugma’g pagmahal sa kasundalohan. Nga maoy nakapabuto sa iyang inahanong emosiyon ug bunga sa imahinasiyon, ang kalami na lang putlag liog ni Bongbong, kinsa wala diay masayod unsay kinatibuk-ang obligasiyon isip maoy commander-in-chief?

Kataw-anang makalagot! Tungod kay ang dili na kasaligang mga Kongresista-Senadores, kinsa hagbay rang naglungotlungot nga i-impeach si Inday, mipagawas dayog statement, nga may something wrong na kuno ang mental health ni Inday ug dapat ipatsek-ap nag psychiatrist.

Pastilan, anaa hinuoy Bongbong nga mokalit lag katawa sa mga pangutana bisag walay kataw-anan, unya gihan-okan pa gayod og daghang authenticated evidence pagmatuod nga kini illegal drug user, dili hinuon maoy ilang ipatan-aw?

Silang mga Kongresista-Senadores, kinsa kanhi pabor sa war on drugs ni Tatay Digong, pero kalit lang misaway-kontra niini paglingkod ni PBBM, diin maoy nakaguba sa natukod na untang good governance nga gibilin sa miaging administrasiyon, dili ba ilang utok maoy na-something wrong?  Dapat, sila maoy unang magpahiling!