Giakusahan ni Bise Presidente Sara Duterte si Justice Secretary Jesus Crispin Remulla nga wala kuno’y alamag sa balaod busa kinahanglang i-ampo nato ang Pilipinas. Giluwatan sa bise presidente ang akusasyon human namahayag ang kalihim sa DOJ nga tun-an niini ang posible’ng mga “legal consequences” sa hulga sa bise presidente sa pag-ugkat sa patay’ng lawas ni kanhi Presidente Marcos, Sr. Sa kahimtang sa Pilipinas karon, dili lang tingale alang kang Remulla ang mga pag-ampo kon dili alang sa tanan’g opisyales sa kagamhanan. Kay ginaingon baya nga, “Ang katuyoan sa pag-ampo dili aron ma-impluwensa nato ang Ginoo kon dili aron pag-usab sa kinaiya sa tawo nga nag-ampo.” Muleeng!
Nag-inusara’ng manager
Naglaraw si DILG Secretary Jonvic Remulla nga kunhoran niya ang gidaghanon sa mga PNP generals gikan sa 133 ngadto na lamang sa 25. Nabatyagan sa kalihim nga “tumba-lobo” (top-heavy) ra kaayo ang PNP ug kinahanglan nga ma-streamline ang organisasyon. Adunay punto ang kalihim. Daghan karon ang mga heneral sa polis nga walay area nga gimandoan ug walay mga kaugalingon’g ginsakpan. Makapahinumdum sa akong amigo nga malipayong mitaho nga gipromote na siya isip “building maintenance manager.” Sa dihang gipangutana kon pila ka tawo ang ubos sa iyang kamanduan, yano ra’ng mitubag nga, “Ako ra man’g usa.” Fezteleern!
Walay dawaton’g gasa
Namahayag ang DILG nga dili modawat si Secretary Jonvic Remulla og mga gasa atol unya sa pag-saulog sa iyang adlaw’ng natawhan subay sa “no-gift” policy sa mga opisyales ug empleyado sa kagamhanan. Kon aduna ma’y ihatag nga gasa, i-uli gayod kini sa ahensiya ngadto sa hingtungdan. Dalaygon ang gipakita’ng kinaiya sa kalihim sa DILG. Sukwahi kini sa ubang mga opisyal nga harap-harapan ang pagpangayo og gasa. Hinoon, sa kaadunahan ni Remulla, dili na kinahanglanon ang mga gasa. Haum kang Remulla ang linya sa awit nga nagkanayon, “Unsay anaa kaniya nga wala ako.” Atala lagee!
Vote-buying sa SK
Segun sa COMELEC, adunay kapin sa 250 ka mga midaug nga kandidato sa niaging Barangay ug Sangguniang Kabataan Elections ang wala pa maproklamar tungod sa alegasyon sa vote-buying. Gawas nga wala sila maproklamar, nag-atubang pa gayod ang maong mga kandidato og kaso. Bisan sa kalinghod pa unta sa ilang panghunahuna, natandang na ang kabataan sa kahugaw sa atong sistema sa politika ug gitudloan na nato sila sa pagpanglimbong. Tinuod ang panultihon nga “Ang labing seguro nga paagi pag-kurap sa kabataan mao ang pagtudlo kanila sa paghatag og dakong pagtamod sa mga tikasan.” Madahaan!
Way makat-onan ang gigutom
Gilagdaan ni Presidente Marcos ang Akta Republika 12028 o ang Academic Recovery and Accessible Leaning (ARAL) Act, ang balaod nga gitumong sa paghatag og mga learning interventions aron matubag ang mga kakulangon sa kahibalo sa mga kabos nga tinun-an hilabi na sa natad sa reading, mathematics ug science. Angayan usab tingale tutokan ang naghingapin nga kalisod sa katawhan. Dili ikalimod nga adunay direkta’ng relasyon ang kawad-on ug ang paglambo sa pangisip sa bata. Mao kana’y giingon nga, “Kon magsakit ang tiyan, walay sulod ang tiyan; kon magsakit ang ulo, aw, wala pu’y sulod ang ulo.” Pagkatoytoy!