Lipatlipat ni VP Sara
Imbes mopasabot nganong niabot og P53 milyones ang gasto sa iyang safehouses sulod sa usa ka tuig ug nganong iyang giilog ang youth leadership summits gikan sa Armed Forces of the Philippines (AFP), gisunod ni Bise Presidente Sara Duterte ang tambag nga opensa ang kinakusgang depensa.
Maong wala siya moatubang sa mga kongresista, wala sugoa ang mga opisyal sa Office of the Vice President (OVP) sa pagrepresentar niya, niinsistir nga adto ra sila motubag sa Commission on Audit (COA) ug sa mga korte ug niusab sa slogan sa OVP gikan sa pagtabang sa pamilya ug sa nasud ngadto sa pagpasidaan sa impiyerno.
* * *
Dayon nihimo siya og press conference nga wala motubag sa mga pasangil sa pangurakot pero nagpahibawo nga:
Nagpakiluoy ang mga Marcos sa pagpadagan niya sa pagka bise presidente kay nahadlok nga mapilde ni Leni Robredo niadtong 2022;
Gipasidan-an niya si Senador Imee Marcos nga, kon dili mohunong ang administrasyon pagsaway niya, iyang ugkaton ang patayng lawas ni Ferdinand Marcos Sr. ug ilabay sa West Philippine Sea; ug
Nakahunahuna siya sa pagputol sa ulo ni Presidente Ferdinand Marcos Jr. dihang nakumbinser nga dili na niya maagwanta ang ilang relasyon.
* * *
Kay wala man tubaga sa managsuong Marcos, gidaginot na lang ni Bise Presidente Duterte ang mga reaksiyon sa mga kongresista nga nipadayag og pagduda sa kahimtang sa iyang panghunahuna:
Ni-boluntaryo nga isibya sa publiko ang iyang neuropsychiatric examination ug hair follicle drug test; pero
Nipataban og kundisyon nga kinahanglan nga mopaubos sab og neuropsychiatric examination ug hair follicle test ang mga nanagan sa pagka kongresista (wala hinuon i-apil ang presidente nga dunay na nilang gipasanginlan nga adik sa cocaine).
* * *
Maayo na lang nga dunay batan-ong mga kongresista nga nakabantay sa lipatlipat ug nisumbalik sa pagpahamtang og mga kundisyon sa ilang pagpaubos sa neuropsychiatric ug hair follicle test:
Kinahanglang moatubang si Bise Presidente Duterte ug motubag sa mga pangutana sa imbestigasyon sa mga kongresista; ug
Kinahanglang mopasabot ug mopakita sa mga dokumento giunsa paggasto ang binilyon ka pesos nga gi-disallow sa COA sa mga gasto sa OVP ug sa Department of Education (DepEd) ubos sa iyang pagdumala sa niaging duha ka tuig.
* * *
- Latest
