Makabalik ba si Rama?

Gimandoan sa Supreme Court ang Commission on Elections nga dili tangtangon ang nga’n ni dismissed mayor Michael Rama ingon man ni Mandaue City Mayor Jonas Cortes gikan sa listahan sa mga   kandidato.

Kini bisan og gipa-dismiss na sila sa Ombudsman tungod sa lainlaing kaso kay mohimo pa og hearing ang Supreme Court sa pangangkon nila ni Rama ug Cortes nga ang resolusyon sa Comelec nga di na sila makapapili, usa ka kalapasan sa balaod.

Matud sa Comelec nga kay sila si Rama ug Cortes gi-dismiss na man sa Ombudsman, ug apil man sa silot nga di na gyud sila makahupot og bisan unsang trabaho sa kagamhanan, nagpasabot nga di na sila katugotan nga molansar sa election.

Kon wa pa makakuha og Temporary Restraining Order (TRO) gikan sa Supreme Court sila si Rama ug Cortes, siguradong dili iapil sa pag-imprinta sa balota ang ilang mga ngalan, ug di sila mabotohan sa katawhan.

Si Rama nagpapili pagbalik pagka mayor sa Cebu City, samtang si Cortes pagka mayor gihapon sa Mandaue City. Ang ila hinuong mga kaso wa maglambigit og pagpangawkaw sa kwarta sa kagamhanan.

Unang gipahamtangan si Rama uban sa laing pito ka kawani sa City Hall og unom ka buwan nga preventive suspension tungod kay wa dayon masweldohi ang upat ka kawani sa City Hall sulod sa 10 ka buwan.

Wa pa gani mahuman ang unom ka buwan nga preventive suspension, gisilotan na sab si Rama og dismissal gikan sa serbisyo kay mipatrabaho sa City Hall isip mga kaswal sa duha ka igsuon sa iyang asawa.

Karon, dunay nangutana, makalingkod ba pagbalik si Rama pagka mayor sa Cebu City human sa unom ka buwan nga preventive suspension nga gipahamtang sa Ombudsman batok kaniya kay mapupos man kini karong Nobiyembre 10?

Sa akong tan-aw, mora’g dili pa siya makabalik gawas lang kon makakuha ang iyang mga abogado og laing Temporary Restraining Order (TRO) nga magpugong sa Ombudsman sa pag-implementar sa kamandoan niini pag-dismiss ni Rama.

Timan-i nga ang gi-grant sa Supreme Court mao ra ang paghatag og TRO aron pugngan ang Comelec nga dili tangtangon ang ngan ni Rama.

Si Cortes misunod sab pagduso og petisyon sa Supreme Court ug pareho sila nga gihatagan og TRO.

Apan usbon ko, ang TRO nga giisyu sa Supreme Court wa kini labot sa hukom sa Ombudsman nga nagpa-dismiss ni Rama sa iyang pagka mayor.

Kon makakuha og laing TRO ang mga abogado ni Rama, kana pwede na siyang makabalik sa pwesto.