EDITORYAL - Iregularidad sa CBRT?

Husto kaayo kining gihimo sa Konseho sa Dakbayan sa Sugbu nga magporma og ad hoc committee nga mosusi aning gipasangil nga iregulaidad sa pagpalit og mga luna para himuong relokasyon sa mga maapektahan sa gitukod nga Cebu Bus Rapid Transit (CBRT) project.

Una niini, si Konsehal James Anthony Cuenco, tsirman sa committee on transportation ug si Konsehal Philip Zafra misugyot sa pagporma sa maong komitiba aron malili kini human nga adunay mga nanggawas nga mura og matud pa nila iregularidad.

Ang pagpalit og luna nga himuong relokasyon sa mga maapektahan konektado kini sa Resettlement Action Plan (RAP) sa siyudad aning CBRT packages 2 ug 3 diha sa Mambaling.

Ang mopalit niini mao ang Department of Transportation (DOTr) pinaagi sa loan gikan sa World Bank (WB) ug gobiyerno sa nasud sa France para mahimo ang maong proyekto. Gani gikatahong na-download na ang P450 milyones para niini niadto pang nakalabay nga duha ka tuig.

Ang trabaho sa siyudad mao ang pag-ila ug pagpangita og mga luna aron irekomendar ngadto sa National Housing Authority (NHA) ug ang naulahi na maoy bahala sa pagtukod sa mga balay sa mga ma-relocate.

Kun kanang tanan maoy basihan, maayo kaayo. Ang iregularidad nga nakita mao nga dunay mga luna nga napilian para ipapalit nga usa ray tag-iya nga nagbase sa Tejero. Ang matag metro-kwadrado tag P83 mil nga moabota tanan og P180 milyones.

Naa paman tingali laing mapalit nga haom nga mga luna nga pwedeng paliton ilabi na nga adunay mga luna ang siyudad para niini. Karon kinsa man kaha ang mga tawong maoy namugos nga kining mga lunaa sa usa ka korporasyon maoy ipapalit?

Lokal ba kini sila nga opisyal o may nalambigit nga mga nasudnong opisyales nga dunay impluwensiya sa maong proyekto?

Inutang baya ning kwartaha, ug ang katawhan maoy magbayad. Kung naay mas barato ug makapahimulos sab ang siyudad sa halin, nganong dili kini maoy gipili nga maoy ipapalit?