Laing kakak ni Duterte
Nisumbalik niya ang pagtalaw ni kanhi Presidente Rodrigo Duterte sa pag-atubang ug pagtubag sa mga pangutana sa House Quad Committee gahapon. Nipuli sa luna para unta niya si kanhi Senador Leila de Lima, usa sa labing unang nisukwahi sa extrajudicial killings (EJKs) sa iyang drug war.
Nadunggan na hinuon sa minilyon ka mga Pilipino, nga nag-atang unta sa kanhi presidente, ang makiangayon nga pagpahinumdom ni de Lima sa mga kongresista nga nagpagamit ni Duterte sa pagpakauwaw niya ug sa mga senador nga nagpahudlat ni Duterte sa pagpahilom niya sa 2016.
* * *
Si Duterte ang nanghagit sa QuadComm dihang nagpa-interview sa SMNI nga gipanag-iya ni Apollo Quiboloy niadtong Huwebes sa niaging semana nga siyay angayng imbitahon aron matubag ang tanan nilang pangutana. Pero dihang giimbitar na, nikakak.
Niadtong Mayo 6, 2021, nanghagit si Duterte ni retired Supreme Court Senior Associate Justice Antonio Carpio og debate sa West Philippine Sea. Pero dihang gidawat ni Carpio ang hagit, niatras siya.
Mas daghan pang insidente nga momatuod nga si Duterte isog lang sa pagpasalipod sa mga polis. Nakapait kay daghang nangamatay sa iyang katalawan.
* * *
Hinaut nga ang mga wala pang kahibawo ug niapil lang sa pagbugalbugal niya makaamgo na karon sa dakong inhustisya nga nahiagoman ni de Lima tungod sa mga ebidensiya nga gi-imbento sa administrasyon ni Duterte batok niya.
Napriso si de Lima og dul-an sa pito ka tuig tungod sa iyang pagpangahas pag-imbestigar sa Davao Death Squad dihang mayor pa si Duterte sa 2009 ug sa EJKs dihang presidente na si Duterte sa 2016.
* * *
Nahilaw si Kongresista Ace Barbers, presiding officer sa QuadComm, dihang gibaraw sa iyang kaubanan ang paghatag niyang Duterte sa tanang pabor nga gihikaw sa ubang resource persons–pagmatuod nga iyang abogado ang nisuwat sa QuadComm ug pagpresentar og medical certificate sa iyang sakit.
Mas nataphaw ang paggamit ni Barbers sa edad ni Duterte pagmatuod sa katandugon sa iyang panglawas dihang nibarug ang mas hamtong pang mga paryente sa mga biktima sa iyang EJKs nga, bisan sa kakabos ug hulga nga bawosan sa nahibilin pang mga gaway sa kanhi presidente, nangisog pag-atubang sa QuadComm aron pagmatuod sa kapintas sa duguon niyang mga krimen.
* * *
- Latest
