Bulan sa Rosaryo

Matag bulan sa Oktubre ato gyud ning igahin sa Bulan sa Santos nga Rosaryo.

Isip mga Katolikong matuohon gidasig kita nga mag-ampo ug mamalandong sa Santos nga Rosaryo dili lang sa Bulan sa Oktubre kondili sa tanang mga adlaw sulod sa tuig!

Kay matud pa ni Padre Peyton: “The Family that prays Together, Stays Together!” Maanindot kini nga talan-awon apan subo palandungon nga daghanan na usab sa katawhan karon ang nahikalimot sa dakong bili ning maong pag-ampo ug kabilin gikan sa atong mga katigulangan.

Sa laing bahin, ang rosaryohan usa man ka dakong hinagiban batok sa gahom sa kangitngit. Kun pinaagi sa pag-ampo sa Santos nga Rosaryo nagmadaugon ang pagtuo didto sa gubat sa Lepanto unsa pa kaha ang pagahimoong gubat batok sa yawa ug sa iyang mga hinanib nga hangtod karong mga panahona padayong nanghulga ug nagdala og kadaot sa daghang mga kabanayan sa kalibutan.

Kun magun-ob ang matag pamilya mosunod usab og kaguba ang katilingban sanglit ang pamilya mao man ang sukaranan sa katilingban.

Usa ka dakong kastigo alang sa yawa ang matag Maghimaya ka Maria kun Ave Maria. Matag misteryo nga atong pamalandongan usa man ka kahimanan aron atong masabtan ang halawom nga kahulogan sa matag misteryo sa kinabuhi sa atong Ginoo sukad sa iyang pagkahimugso ngadto na sa iyang pagsaka sa langit.

Kining tanan atong makita ug masinati diha sa mga misteryo sa Santos nga Rosaryo gikan sa mga Misteryo sa Kalipay ngadto na sa Misteryo sa Kahayag. Ang Rosaryo sa Mahal nga Inahan taming nga manalipod batok sa dautan!