Basta barato daghan gyud ang maingganyo. Kini ang kinaiya sa mga tawo sama nalang sa mga nabiktima sa modus sa rentangay, ang modus nga abangan ang sakyanan niining mga tampalasan nga kawatan ug ibaligya pud ngadto sa mga tawo nga nanaginot nga makabarato sa sakyanan nga ilang mapalit.
Midagsa ang mga biktima sa buhatan sa Highway Patrol Group kon HPG-7 human nadakpan ang usa sa mga sakop sa grupo sa mga kawatan sa atubangan atol sa gipahigayon nga operasyon sa mga operatiba s HPG. Gikaluy-an sila sa Ginoo kay nabawi pa ang ilang mga awto nga sedan nga halos tanan ra ba mga inutang ug padayon ang ilang pagbayad niini sa bangko.
Kong giswerte kining mga tag-iya nga nabawi nila ang ilang mga sakyanan, apan gidemalas kining mga nakapalit kay wala naman nabalik ang ilang gibayad sa sakyanan human nakasibat ang gitumbok nga utok sa rentangay o labaw casa gang.
Ang modus niining grupoha mangabang og mga sakyanan nga ilang makita sa social media.
Dili gyud kadudahan kay mobayad man dayon in full kong pila ka adlaw nila abangan ang sakyanan unya dili pa gyud mangayo og sukli ug maayo kaayo mo-sales talk nga maganahan usab ang tag iya sa sakyanan.
Ang estilo nila nga abangan ang sakyanan hangtud mahalin na ug dili na makontak sa tag-iya nga walay alamag nga nabiktima na diay siya, samtang ang mga nakapalit sa sakyanan wala pud masayod nga sila ang ikaduhang biktima.
Aron dili kadudahan, ibaligya nila ang sakyanan sa igo-igo ra usab nga presyo gamit ang mga falsified documents.
Naa matud pa silay karaan nga papel nga maoy gigamit kaniadto sa car registration. Genuine kini kaniadto apan dili na karon kini magamit kay naa namay bag-ong format ang papel nga gigamit sa car registration kadtong murag usa ka bondpaper size.
Daghan gyud ang nailad. Gani matud sa HPG nga mo-average kining grupoha og lima ka mga sakyanan nga ilang marentangay ug mahalin kada adlaw dili lang sa Sugbo o Central Visayas kon dili nationwide ang ilang operation.
Ang nadakpan nga babayeng tig transact taga Bulacan man. Notado na sila sa ingon niini nga pagpangawat sa atubangan kay patong patong na sa kaso ang ilang giatubang apan makagawas ra man gihapon kay makapyansa man.
Nganong ingon niini sila ka isog mohimo sa ingon niini modus? Dili nato mapadaplin ang posibilidad nga aduna silay koneksiyon kong si kinsa man sila ra gyud ang nasayod busa gikinahanglan ang lawom nga pakisusi kong duna man silay kakunsabo.
Pahimangno ni P/Lt. Col. Wilbert Parillda ang Regional Chief sa HPG 7 nga susihon gyud og maayo ang tanan gikinahanglang susihon ugaling mopalit og sakyanan.
Mas maayo makig-alayonsa ilang buhatan o sa LTO aron dili mabiktima niining mga tawhana.
Samtang angayan daygon ang mga personnel sa HPG Regional Office 7 sa dakong kalamposan nga ilang nahimo batok niining mga kawatan nga naghatag og kadaut sa katilingban.