EDITORYAL - Badlungon sa karsada

Ang Highway Patrol Group-7 kauban ang ubang mga departamento sa Cebu City Hall nilusad og operasyon batok sa mga nagpabadlong nga mga motorista diha sa Transcentral Highway.

Ang tumong mao ang pagsiguro nga luwas para sa tanan ang pagbiyahe diha sa maong nabantog nga highway nga nagkonektar sa Cebu City ug sa mga kalungsoran sa kasadpang bahing sa probinsya sa Sugbu.

Ang maong highway nakapamubo sa oras sa biyahe gikan sa sidlakang bahin sa Sugbu padung sa kasadpan mao nga daghan ang mga sakyanan ug motorsiklo nga moagi diha aron maghatud og pasahero o mga produkto.

Apan gawas sa maong buhat, gihimo sab kining lugar diin magpasikatay sa ubang riders kay anha man hinuon maglumba-lumba ug mag-eksibisyon.

Hinuon dili tanang nagmotorsiklo diha ang nagpabadlong kay mas daghan ang tarong ug nanigurado sa ilang kaluwasan ug sa ubang mga motorista.

Naa ra gyuy pipila ka lugas nga mga badlungong riders ug sagad hinungdan sa disgrasya o aksidente.

Apan dili lang baya sa TCH dunay mga susamang aksidente, naa pud sa ubang mga dapit sa Sugbu, sagad naa sa mga sementadong mga dalan sa kabukiran.

Daghan naman sab gud mga nindot nga masuroyan sa kabukiran karon ug accessible na gyud para sa dunay mga sakyanan o motor.

Gawas sa mga resorts daghan na sab ang mga tindahan diha sa daplin sa TCH nga mas barato ug namaligya sab og mga ilimnong makahubog.

Samtang dili tanang nag-rides pasaka sa TCH inom ang tuyo sa taas, duna gyuy pipila nila ang  manginom gyud apan peligro lang kay momaneho pa sila pabalik og lugsong unya maglumba-lumba na ang uban.  Anhi ng dapita dunay mga aksidenteng mahitabo.

Ang pait kay duna nay nangapagan nga tarong nga mga motoristang nigamit sab sa karsada tungod lang sa kakiat aning pipila ka lugas nga badlungong mga drayber.

Husto kining gibuhat sa pagsusi sa taga City Hall kining mga tindahan diha sa TCH kay para man kini sa kaayohan sa  tanan.