Daghang motorista ug mga sumasakay nga nangreklamo sa miaging semana tungod kay pwerteng grabeha sa traffic nga hapit na lang dili mosibog ang mga sakyanan diha sa karsada.
Dunay uban nga nakapanglantaw nga mosamot ang problema sa traffic kon magsugod na nga i-limit ang mga sakyanan nga paagion sa Osmeña Boulevard gikan sa eskina Sanciangko lahos na sa Plaza Independencia.
Ang pasiunang plano mao nga kadto ra'ng mga public utility vehicles, sama sa passenger jeepneys, taxi, ambulansya, police vehicles, fire trucks ug mga emergency vehicles maoy tugotan nga makaagi sa Osmena Blvd.
Sa ato pa, kay ang mga private vehicles dili na man paagion sa maong bahin sa Osmena Boulevard, adto na sila moagi sa mga secondary roads.
Kon gikan ka sa Plaza Independencia unya mopaingon ka sa Colon Street, o kaha moadto ka sa uptown area, ang karsada nga imong maagian mao ra ang V. Gullas (karon Manalili Street) ug ang Magallanes Street.
Kon ako'y pagbut-on, kining maong mga karsada angay'ng hawanan daan, dili na paparkingan ang karsada mga karsada nga lumbay sa Osmena Boulevard, aron nga motulin ang dagan sa mga sakyanan.
Para nako, mas maayo man gani nga undangon na sa Cebu City government ang kontrata ngadto sa Tokagawa Global Corporation kay mag-unsa man ang P8.7 Million nga mabahin sa siyudad kada tuig, unya ang bugti niini grabeng traffic.
Sigurado ko nga kon dili na paparkingan ang mga karsada, molapad ni, ug makatabang sa paghapsay sa trapiko. Dunay nangutana kon asa man moparking ang mga motorista?
Ang tubag niini mao nga ang mga tag-iya og bakanteng lote, ug ang mga magpapatigayon, awhagon nga maghimo sila og parking area kay makakwarta pa sila.
* * *
Gipahibawo ni Mayor Raymond Garcia nga kapin sa P17 bilyones ang giduso niyang budget sa syudad para sa tuig 2025.
Nakadayeg ko kay dili kaayo dako ang budget nga kon maninguha lang ang mga tax collectors, sigurado nga makuha ra gyud ang maong kantidad.
Mag-unsa man kon mosugyot ta og dako kaayong budget unya lisud ug imposible diay kining makolekta aron mapundohan ang gi-budget nga kantidad.
Apil sa mga dagko kaayo nga gastohon sa siyudad mao ang kapin P2 Bilyones para sa sweldo sa mga kawani, ug P1.2 Bilyones nga para sa csh assistance sa Cebu City accredited senior citizens, ug daghan pa nga mga proyekto.