Kanta sa EJKs
Yabag ang tuno sa mayoriya sa mga senador sa pagbanhaw sa imbestigasyon sa extrajudicial killings sa drug war. Nga sila untay nagsugod pero ilang gisurender sa 2016. Tungod sa panghudlat ni kanhi Presidente Rodrigo Duterte.
Human nabadlong ang gipasanginlang mga senador (Bato dela Rosa ug Bong Go) pag-imbestigar sa ilang kaugalingon, gipasa-pasa ang trabaho: Si Chiz Escudero, nga dili ganahang modumala sa Senate Committee of the Whole, nipasa sa responsibilidad ngadto sa Senate Blue Ribbon Committee; kansang pangulo nga si Pia Cayetano nipasa sab sa imbestigasyon ngadto sa subcommittee ni Koko Pimentel.
* * *
10 sa incumbent nga mga senador niapil pagpalagpot ni kanhi Senador Leila de Lima. Isip pangulo sa komitiba nga nangulo sa imbestigasyon sa 2016. Nga gisunod sa House Quad Committee. Duguon ang ilang mga kamot kay dili unta makalas ang 35,000 ka kinabuhi kon nabaraw pa dayong mga binuang sa drug war walo ka tuig ang nilabay.
Imbes mangayo og pasaylo sa katawhan ug ni de Lima, nagpaugat sa sayop nilang desisyon ang mosunod: Koko Pimentel, Nancy Binay, Grace Poe, Cynthia Villar, Alan Peter Cayetano, JV Ejercito, Win Gatchalian, Loren Legarda, Joel Villanueva ug Migz Zubiri.
* * *
Sintunawo si Pimentel nga modumala sa bag-ong imbestigasyon. Gawas sa iyang pagbukubuko ni de Lima, gipremyohan ni Duterte ang iyang kasipsip pinaagi sa pag-ilog sa PDP-Laban gikan niya. Dugang mga ngalan nga angayng timan-an:
• Tulo ka senador nga nibaraw sa imbestigasyon sa 2016 gustong mobalik sa Senado (Tito Sotto, Ping Lacson ug Manny Pacquiao); ug
• Duha ka senador nga nisuporta ni de Lima sa pagpadayon sa imbestigasyon magpapili sab sunod tuig (Kiko Pangilinan ug Bam Aquino).
* * *
Dili lumba ang imbestigasyon sa EJKs. Pero kon dili dayon makasugod ang imbestigasyon sa Senado karong semanaha, kay kinahanglan pa silang magtuon ug mangandam sa abundang mga testimoniya ug mga ebidensiya nga nahipos sa mga kongresista, mahimong wala nay mahagdaw ang mga senador.
Mohimo ang QuadComm sa ilang ikasiyam nga public hearing ugma, Oktubre 22. Kanus-a gipanghinaot nga matukod nang choral group sa House detention facility. Kon sama ni Koronel Royina Garma mokanta na sab silang Koronel Edilberto Leonardo ug ilang classmates sa Philippine National Police Academy mga gitanggong.
* * *
- Latest
