Mesteryo sa pribadong menteryo

Tanghaga hangtod karon kon si kinsa man gyud ang nanag-iya sa pribadong sam-ang sa Barangay Poblacion Pardo sa dakbayan sa Sugbo diin gipahiluna ang mga adunay kaya sa katilingban apil na gani kadtong mga prominenteng pamilya.

Tapad ra gyud kini sa Catholic Cemetery sa Pardo nga gidumala sa simbahan diin matud pa sa mga opisyal sa barangay nga kaniadto mora'g nahimong kabahin sa menteryo Katoliko ang private cemetery. Apan dihang gikoral na sa Simbahan ang ilang sam-ang nasayran nga mas luag ang nasakopan nga luna niining mga lubnganan nga iya sa pribadong indibidwal.

Gibisita nako niadtong Biyernes ang naasoyng sam-ang human usab akong nadawat ang reklamo sa molupyo kansang balay tapad ra gyud sa mga balay sa mga patay. Giubanan usab ako sa mga opisyal sa barangay. Matud nila ang dapit gitawag nga kilmen o kilid menteryo.

Sa unang tan-aw nagbuntaog ang mga edipisyo nga tag dos andanas nga susama gyud og balay apan sa sulod niini ang mga lubnganan diin aduna pa ganiy uban nga de aircon pa ug naa pay cctv camera. Gani mora'g middle class subdivision gyud ang sitwasyon sa sam-ang nga ang mga mausoleum murag bongalo nga daw pinuy-anan sa mga buhi, ang nakalahi lang hilom kaayo ang palibot.

Ang ubang mausoleum nag-umbaw pa sa mga balay sa mga buhi nga naa ra sa kilid, mora'g ma-insecure ang mga balay sa mga buhi kay napuhalan man sa mga balay sa mga patay.

Bisan pa man kon high end ang maong sam-ang apan dili matumbok sa barangay ug bisan gani sa Cebu City LGU kinsa ang nanag iya ini kay wala may nag-manage maong wala puy regulation hinungdan nga gipasirad-an kini pipila ka tuig na ang nakalabay.

Pipila sa kalapasan wala magbayad og buhis, peligro usab sa panglawas sa mga tawo nga nagpuyo sanglit kilid ra ma man gyud kini sa mga balay sa mga buhi. Apan bisan og duna nay closure order naa pa gihapoy gilubong.

Kinsa man ang mohatag og pagtugot ug kinsa ang modawat sa bayad kon duna man? Paunhanay lang kuno kong kinsa ang naay kontak sa sulod sa sam-ang ang makakuha og luna nga kalubngan. Naa pa ganiy nag ingon nga 50 mil ngadto sa 60 mil pesos ang bayad.

Gikatakdang ipatawag sa barangay uban ang mga opisyal sa Cebu City ang mga nalambigit apil na ang mga pamilya sa gilubong aron mahatagan og katin-awan ang tanan. Dinhi higpit nga ipatuman ang closure sa sam-ang. Hinuon kadtong mga nalubong na mamahimo ra gihapon silang makaduaw sa ilang mga mahal sa kinabuhi.

Basin mahatagan na og katin-awan ang mesteryo nga naglimin sa menteryo.