Karong buwana, Oktobre, gitimaan sa Pilipinas ang Mental Health Month agi og paghatag og dugang kasayuran ug impormasyon kabahin sa importansiya niini sa katilingban. Didto sa Amerika, saulogon kini matag bulan sa Mayo sukad pa niadtong 1949.
Apan bisan unsa pang petsaha o bulana kini iselebrar, angay masayod ang publiko kun unsa kini ka mahinungdanon sa tagsa-tagsa kanato.
Kaniadto, wala ra gyuy pagpakabana ang publiko bahin niini, gani duna pay mga miingon nga “pang batan-on” ra daw ni karon kay daghan na sa ilang henerasyon ang mga reklamador ug dili gustong magpapitol sa mga ginikanan ug katiguwangan.
Hinuon may pagkatinuod baya kining obserbasyon sa uban bisan tuod og kuwang og basihan. Kay kaniadto, wala man mauso nga hatagan og pagtagad kadtong mga dunay mga gihambing dagkong problema, gani bugal-bugalan lang sa uban nga makapasamot sa sitwasyon,
Tinuod aduna gyuy mga tawo nga matud pa nalisoan sa maayong pangisip tungod sa ilang mga problema, dunay uban napasmohan, ug duna say uban nga epekto sa sobrang paggamit og ilegal nga drugas.
Ang labing subo kaayong palandungon kanang mga nagkutlo sa ilang kinabuhi. Dili na sila matawag nga nalisoan sa maayong pangisip kondili wala na gyud silay nahunahunaan nga kadangpan o wala gyud silay masaligan nga tug-anan sa ilang problema o makahatag kanila og solusyon.
Pagkatinuod, kaning mga gipanghisgutan sa taas duna gyuy ugat o sinugdanan. Apan wala hatagi og pagtagad sa gamay pa, hangtud nga nigrabe.
Ang kapiskay sa panglawas kanunay maapektahan sa kung unsa ang kahimtang sa pangisip o panghunahuna sa usa ka tawo.
Makaapektar sab kini sa paghimo og mga desisyon, sakto man o dili. Busa, importante gyud nga hatagan kini og pagtagad ilabi na sa mga ginikanan ngadto sa ilang mga anak.
Kinahanglan nga bukas ang tanan pagdawat nga seryuso kini nga butang ug dili kabiay-biayan kay daghan ng mga tarong nga nagkutlo og kinabuhi tungod walay niseryuso sa ilang gisumbong nga problema o wala na silay salig sa uban o sa sistema.
Angay unta nga seryusohon ang mental health ug anha kining tanan magsugod sa tagsa-tagsa ka pamilya, sa dili pa maabot sa gawas.a