Maayong Balita
Ang duha ka managsuon niduol kang Jesus aron mohangyo og usa ka butang. Sa ubang teksto sa mga ebanghelyo, kuyog pa gani ang ilang inahan aron kang Jesus mohangyo nga inig-abot sa panahon sa iyang paghari ang duha niya ka mga anak ang molingkod gyud sa iyang kiliran.
Butang nga gitataw ni Jesus nga ang nahisgotang mga luna gitagana na sa mga tawo nga gimbut-an sa Amahan nga maoy molingkod niini. Dugang pa, giklaro sa atong Ginoo nga si bisan kinsang nagtinguha nga mamahimong labaw ug dako kinahanglang mamahimong ulipon alang sa kadaghanan.
Kasinatian. Ang atong kalibotan nagtudlo kanato nga kinahanglang manlimbasog kita aron mamahimong labaw ug maanaa sa posisyon.
Atong nasaksihan nga daghang mga namunoan malokal man o nasyonal ang nigamit sa ilang posisyon aron mapatumaw ang ilang kaugalingong tumong ug kawsa.
Ang uban gamiton sa pagpanggukod sa ilang mga kaaway. Ang luoy mao kadtong kinabag-an nga napagan sa maong pagpasagad.
Ang linugdangan mao nga daghan ang naamong ug nahikawan sa mga serbisyo publiko nga kun buot hunahunaon ilang katungod nga pagadawaton.
Lihok. Karong semanaha himoa ang pagpangalagad kanila nga mas nagkinahanglan pa kay kanimo. Hinumdomi nga diha sa pagpangalagad walay promotion o demotion. Ang tanan atong pagahimoon alang sa dugang kahimayaan sa Dios.
Kun buot natong mahimong dako ug labaw atubangan sa Dios kinahanglang mangalagad kita diha sa pagpaubos.
Pangamuyo. (Tanan) Ginoo ania kami. Paalagara kami! Ngadto sa pinakaubos namong mga igsuon aron pinaagi kanila, mas higugmaon ikaw namo. Amen.