Ambot diin gikan ang kalagot ni Bise Presidente Sara Duterte kang Presidente Bongbong Marcos nga wala man gyud unta manghilabot ang presidente niya.
Gani wala gyud ta kadungog nga mibuhi siya og bati nga mga pulong batok ni Sara.
Apan sa labing awahing press con sa bise presidente, bug-at ang iyang tirada batok sa kanhi niya kaalyado sa politika.
Matud ni Sara nga di kuno kamao mahimong presidente si BBM. Iya pang gihisgutan atol sa press con nga iyang gibaharan ang igsuon sa presidente nga si Senador Imee Marcos nga iyang ugkaton ang patay'ng lawas sa ilang amahan nga si kanhi diktador Ferdinand Marcos Sr. gikan sa Libingan ng mga Bayani ug itambog sa West Philippine Sea kun dili mahunong ang mga ataki batok niya.
Ang kontra ni Sara dili ang presidente kun dili ang ig-agaw niini nga si Speaker Martin Romualdez.
Apan nganong ang presidente maoy iyang gipunting sa iyang kalagot?
Ang tubag simple---buot niyang badlongon sa presidente ang Kongreso aron hunongon ang pagpunay og ugkat sa mga pasangil sa anomaliya sa iyang buhatan paggasto sa intelligence fund.
Alang ni Sara ang usa ka maayong presidente kamaong morenda sa Kongreso.
Tataw nga gusto ni Sara nga himuon sab ni PBBM nga rubber stamp ang Kongreso sama sa gihimo sa iyang amahan nga si kanhi presidente Rodrigo Duterte.
Nagdahom siya nga tungod kay kauban man sila sa UniTeam niadtong eleksiyon gawngan ni BBM ang mga kongresista aron di siyang kutikutihon.
Alang nako way sayop sa gihimo sa presidente. Husto nga iyang gipasagdan ang mga sakop sa kongreso nga mohimo sa ilang oversight functions.
Ang angayang buhaton ni Sara, inay masuko sa presidente, si Romualdez ug ang iyang mga kaalyado sa kongreso maoy iyang gubaton.
Dili na bag-o si Sara sa politika busa sayod ko nga nahibawo na siya unsay angayang buhaton.
Inay mapikon sa mga ataki batok niya, angayang kontrolahon ni Sara ang iyang kaugalingon ug tubagon og tarong ang mga isyu batok niya.
Angayan niyang hinumduman nga sa politika pildi ang pikon.