Nanawagan ang Healthy Philippines Alliance (HPA) sa mga magbabalaod sa pagpanday og balaod nga magmando sa pagbutang og food warning labels sa mga produkto sa tuyo nga makapili ang mga konsumidor sa saktong pagkaon ug aron usab mabatokan ang non-communicable disease. Mora’g may pagka-elitista man ang maong panawagan sa HPA. Naghingapin ang kakabos sa Pilipinas ug ang mahinungdanon mao nga masudlan ang nagkutoy nila’ng tiyan. Makapahinumdum sa bata nga naghinilak tungod sa kagutom. Gipahilom sa inahan ang bata dungan ang paghadlok niini nga naay wakwak. Tungod ba kaha sa kagutom, mitubag ang bata nga, “Mokaon ko og Wakwak.” Madahaan!
Rebisahon ang balaod
Buot sa COMELEC nga rebisahon ug dili kay amendahan lang ang Party-list Law sa tuyo nga matubag ug mapadayag ang desisyon sa Korte Suprema labi na sa issue sa tinuod nga representasyon sa mga marginalized, under-represented ug proportionality. Dakong sayop ang Party-list nga balaod kay wala man makab-ot ang tumong niini. Matud pa sa akong amigo, “Uyon kaayo ko nga rebisahon o ba kaha wagtangon na lang gayod ang Party-list Law. Kon mahimo, dunganon na lang pud sa Kongreso pag-amendar ang ‘Law of Supply and Demand’ aron maprotektahan ang mga kabus sa kanunay’ng pagsaka sa presyo sa palaliton.” Madahaan!
Permanente’ng interest
Gitataw ni kanhi Bise Presidente Leni Robredo nga giabi-abi niya si Presidente Marcos sa iyang pagbisita sa Sorsogon City agi og pagrespeto sa presidente. Bisan sa pamahayag ni Robredo mipadayag gihapon ang presidente sa iyang kalipay sa pagtoo nga sinugdanan na kini sa political reconciliation tali kaniya ug sa kanhi bise presidente. Dili kahibudngan ang pamahayag sa matag habig kay alang sa mga beterano’ng politiko, dili matag-an ang umaabot kon politika na ang hisgutan. Kay matud pa bitaw, “Sa politika, wala’y permanente’ng kaanib o kaaway; aduna lama’y permanenting interest nga angayan protektahan.” Fezteleern!
Wala na’y uniteam
Mibuhi og mga “hapdos” nga pulong si Bise Presidente Sara Duterte batok kang Presidente Marcos pinaagi sa pag-ingon nga giguyod sa presidente ang nasud paingon sa impyerno dungan ang paghulga nga ugkaton niya ang patay’ng lawas sa amahan sa presidente ug itambog niya kini ngadto sa West Philippine Sea. Hingpit na ang panagbuwag sa banay’ng Marcos ug Duterte ug wala na’y matawag sa katawhan nga “Uni-Team”. Apan matud pa sa akong silingan, “Bahala’g wa na’y Uni-Team, basta dili lang masira ang Unitop kay aduna pa’y barato nga tindahan.” Ateerr!
Nadisturbo ang kalag
Mopakatap ang Mandaue City og dili momenos 300 ka personnel aron pagseguro nga luwas ang publiko atol sa pagsaulog sa kalag-kalag karong Nobyembre 1 ug 2. Tuyo sa kagamhanan nga mapugngan ang over-crowding. Batasan nato nga duawon ang atong mga mahal nga mitaliwan sa ilang lubnganan sa panahon sa kalag-kalag. Apan ni’ng maong kustombre, nakatuaw ang akong amigo sa pag-ingon, “Giampo nato ang malinawon’g pagpahulay sa mga minatay. Apan sa kadaghan sa tawo sa menteryo, dili kaha madisturbo sa hilabihan ang mga kalag? Rest in Peace sa imong mata!” Pagkatoytoy!